BDU-DA DÜNYA AZƏRBAYCANLILARININ ƏLAQƏLƏNDİRMƏ ŞURASI SƏDRİNİN MÜAVİNİ İLƏ GÖRÜŞ KEÇİRİLMİŞDİR
BDU-nun rektoru, AMEA-nın müxbir üzvü, professor Abel Məhərrəmov Azərbaycanın yeni tarixində noyabrda iki bayramın- Konstitusiya və Milli Dirçəliş günlərinin qeyd edildiyini, həmçinin 2001-ci ilin bu ayında ümummilli liderimiz Heydər Əliyevin təşəbbüsü ilə Dünya Azərbaycanlılarının I qurultayının keçirildiyini diqqətə çarpdırmışdır. Natiq müasir Azərbaycan dövlətinin banisi Heydər Əliyevin müstəqil respublikamızla xaricdə yaşayan soydaşlarımız arasında əlaqələrin yaradılmasına böyük önəm verdiyini vurğulamış və qonağı tədbirin iştirakçılarına təqdim etmişdir.
Professor Qulamrza Səbri Təbrizi 1994-cü və 1998-ci illərdə ulu öndər Heydər Əliyev ilə İngiltərənin paytaxtı Londonda, eləcə də Edinburqda yaşayan soydaşlarımızın görüşlərindən danışmış, ümummilli liderimizin diasporumuzun nümayəndələri qarşısındakı çıxışlarının hər bir azərbaycanlı üçün böyük məktəb olduğunu qeyd etmişdir. O, 2001-ci ildə Bakıda keçirilən Dünya Azərbaycanlılarının I qurultayının ölkəmizin ictimai-siyasi həyatında önəmli hadisə olduğunu, tədbirdə dahi siyasətçi Heydər Əliyevin iştirakçıları vahid ideologiya ətrafında birləşməyə, döğma ölkəmizə xidmət etməyə, azərbaycançılıq məfkurəsini geniş yaymağa çağırdığını vurğulamışdır. Natiq DAƏŞ tərəfindən bu yaxınlarda “Azərbaycan diasporu dünyaya açılan pəncərədir” mövzusunda elmi konfrans keçiriləcəyini söyləmiş və gəncləri bu tədbirdə yaxından iştirak etməyə çağırmışdır. Bildirilmişdir ki, konfransdan məqsəd soydaşlarımızın Ermənistandan deportasiya olunmaları, Dağlıq Qarabağ münaqişəsi, qondarma erməni soyqırımı və digər məsələlərdə vətənpərvər gənclərimizin düşüncə və mülahizələrini öyrənməkdir.
Sonra 17 noyabr – Milli Dirçəliş günü münasibətilə konsert olmuşdur.
Bölmənin digər xəbərləri
