BƏƏ Kosmik Agentliyinin nümayəndəsi: “Azərkosmos” ilə görüşümüz çox səmərəli keçdi
Bakı, 6 oktyabr, AZƏRTAC
Biz Bakıda keçirilən 74-cü Beynəlxalq Astronavtika Konqresində iştirak etməkdən çox məmnunuq. Tədbir yüksək səviyyədə təşkil olunub. İnsanların göstərdikləri qonaqpərvərliyə görə xüsusi təşəkkür etmək istəyirəm.
Bu sözləri AZƏRTAC-a müsahibəsində Birləşmiş Ərəb Əmirliklərinin (BƏƏ) Kosmik Agentliyinin nümayəndəsi Ahmed Al Darei bildirib.
"Bu il 74-cü Beynəlxalq Astronavtika Sərgisinin pavilyonunda BƏƏ Kosmik Agentliyinin stendi də var. Burada ən son proqramlarımızı və layihələrimizi nümayiş etdiririk. Bununla yanaşı, digər beynəlxalq kosmik agentliklərlə əməkdaşlıq barədə müzakirələrimiz olur və onlarla potensial əməkdaşlıq sahələrini araşdırırıq. “Azərkosmos”la çox gözəl ikitərəfli görüşlərimiz oldu. Görüşdə bizim kosmos agentliyinin sədri Sara Al-Amiri iştirak etdi, bu baxımdan BƏƏ Kosmik Agentliyi ilə “Azərkosmos” arasındakı görüş çox səmərəli keçdi", - deyə BƏƏ-nin nümayəndəsi qeyd edib.
“Bakı çox gözəl şəhərdir. Qonaqpərvərlikdən razıyıq. Bakının havası çox gözəldir. Azərbaycanın milli mətbəxinə aid olan kabab isə xüsusilə ləzzətli idi. Hər şeyə görə təşəkkür edirik”, - deyə Ahmed Al Darei vurğulayıb.
Bölmənin digər xəbərləri
