SİYASƏT
Berlində keçirilən tədbirdə Azərbaycandakı inkişaf prosesləri yüksək qiymətləndirilib
Berlin, 21 noyabr, AZƏRTAC
Almaniyadakı Azərbaycanlıların Koordinasiya Mərkəzində (AAKM) “Ukrayna böhranı fonunda Azərbaycan-Avropa münasibətləri” mövzusunda məruzə axşamı təşkil olunub.
AAKM-nin icraçı direktoru Samirə Patser-İsmayılova çıxış edərək dünyadakı mövcud münaqişələrdən, bugünkü geosiyasi və geostrateji şəraitdən, Dağlıq Qarabağ probleminin həlli ilə əlaqədar Azərbaycanın Avropadan gözləntiləri barədə danışıb.
Berlin Azad Universitetinin mühazirəçisi, siyasətşünas Matthias Dornfeldt Azərbaycandakı siyasi, iqtisadi və sosial inkişaf proseslərini yüksək qiymətləndirib. Bu inkişaf yolunda Avropada yeni tərəf müqabillərinin qazanılmasının aktuallığından danışan M.Dornfeldt enerji siyasətində Azərbaycanın artan geostrateji əhəmiyyətini vurğulayıb. Xəzəryanı ölkələrin enerji siyasətində tərəf müqabili kimi Azərbaycanın Avropa İttifaqı üçün önəmli olduğu və bu fonda davamlı olaraq modernləşmə və şaxələndirmə strategiyasının inkişafına tələbin artdığı qeyd edilib.
Tədbirin aparıcısı, Alman-Azərbaycan Forumunun icraçı direktoru Pərviz Yazdani məruzə ilə fikirlərini bildirib.
Məruzə axşamında Azərbaycan səfirliyinin müşaviri Rizvan Nəbiyev və digər əməkdaşlar, Bundestaqın üzvləri, alman ictimaiyyətinin və mediasının, MDB ölkələrinin və Azərbaycan diasporunun nümayəndələri, tələbə və doktorantlar iştirak ediblər.
Vüqar Seyidov
AZƏRTAC-ın xüsusi müxbiri
Berlin