Berlində keçirilən tədbirdə Azərbaycandakı səmərəli idarəetmə barədə danışılıb
Berlin, 13 fevral, AZƏRTAC
Berlin federal vilayəti parlamentinin nəzdində fəaliyyət göstərən Beynəlxalq Təhsil Mərkəzində “Azərbaycanda səmərəli idarəetmə” mövzusunda tədbir keçirilib. Tədbir Berlində yerləşən Avropa Qafqaz və Xəzər Tədqiqatları İnstitutu, Azərbaycan Tələbə Şəbəkəsi və Beynəlxalq Təhsil Mərkəzi tərəfindən təşkil edilib.
İnstitutun rəhbəri, politoloq Matthias Dornfeldt və Berlin Texniki Universitetinin gənc tədqiqatçısı Zaur Mustafayev Azərbaycanda son illərdə səmərəli idarəetmənin inkişafı ilə bağlı məruzələrlə çıxış ediblər.
Matthias Dornfeldt diqqəti “ASAN xidmət”ə yönəldib. O, Azərbaycan iqtisadiyyatının sürətli inkişafını, elektron hökumətə keçidin uğurlarını qeyd edib.
Zaur Mustafayev isə məruzəsində Azərbaycanda sahibkarlığın inkişafı, elektron hökumət və təhsillə bağlı əldə edilən uğurlardan danışıb.
Beynəlxalq Təhsil Mərkəzinin rəhbəri Manuela Ebel çıxış edərək son vaxtlar Almaniyada Azərbaycanın öyrənilməsinə marağın artdığını söyləyib.
Azərbaycan Tələbə Şəbəkəsi adından çıxış edən Günay Rzayeva mədəniyyətimiz və tariximiz haqqında məlumat verib. Sonra ölkəmizlə bağlı videoçarx göstərilib.
Tədbirdə Berlin Azad, Humboldt, Texniki, Potsdam və Frankfurt Viadrina universitetlərinin, Berlin İqtisadiyyat İnstitutunun tələbələri, tədqiqatçıları və pedaqoqları, Azərbaycan Tələbə Şəbəkəsinin üzvləri, Azərbaycanın Almaniyadakı səfirliyinin əməkdaşları daxil olmaqla 70-dən çox qonaq iştirak edib.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
