“Beşiktaş” doğma meydanda xal itirib
Bakı, 22 sentyabr, AZƏRTAC
Sentyabrın 21-də futbol üzrə Türkiyə çempionatının VI turu çərçivəsində “Beşiktaş” doğma meydanda “Adana Dəmirspor”u qəbul edib.
AZƏRTAC xəbər verir ki, qarşılıqlı hücumlar şəraitində keçən görüşə meydan sahibləri fəal başlayıb. Oyunda hesabı 20-ci dəqiqədə İstanbul təmsilçisinin müdafiəçisi Fransisko Montero açıb. “Beşiktaş”ın növbəti qolunu 43-cü dəqiqədə Souza vurub. İkinci hissənin 52-ci dəqiqəsində Rıdvan Yılmaz hesab arasındakı fərqi üç topa çatdırıb. Lakin qonaqların heyətində Matias Varqas 60-cı dəqiqədə fərqlənərək topu çərçivəyə göndərib. Görüşün 79-cu dəqiqəsində Mario Balotelli qol vuraraq hesab arasındakı fərqi minimuma endirib. Oyunda yekun hesabı 90+7-ci dəqiqədə Adana təmsilçisinin futbolçusu Assombalonqa müəyyənləşdirib - 3:3.
Beləliklə, “Adana Dəmirspor” səfərdə geri dönüş edərək “Beşiktaş”la heç-heçə edib.
Günün digər matçında “Yeni Malatyaspor” öz meydanında “Sivasspor”a minimal hesabla uduzub - 0:1. “Altay” isə səfərdə “Rizəspor”u 2:1 hesabı ilə üstələyib. “Fatih Karagümrük” - “Antalyaspor” matçında isə qapılara qol vurulmayıb - 0:0.
Hazırda Türkiyə Superliqasının turnir cədvəlinə 14 xalla “Beşiktaş” başçılıq edir. Ondan bir xal geri olan “Trabzonspor” ikinci, 12 xala malik olan “Altay” isə üçüncü pillədə qərarlaşıb.
Bölmənin digər xəbərləri
