Bəsti Əliyeva: Ulu Öndərlə görüşüm həyatımın ən xoş anlarından biridir
Astara, 26 dekabr, İ.Adıyev, AZƏRTAC
Ulu Öndər Heydər Əliyev müstəqil Azərbaycan dövlətinin memarı və qurucusu, xalqımızın xilaskarıdır. Heydər Əliyevlə görüşüm həyatımın ən xoş və ən mənalı anlarından biridir.
Bunu AZƏRTAC-ın bölgə müxbirinə müsahibəsində astaralı ziyalı Bəsti Əliyeva söyləyib.
O, Ulu Öndərlə görüşünü belə xatırlayır: “1982-ci ilin iyun ayı idi, 19 yaşım vardı. Hüquqşünas olmaq istəyirdim. Sənədlərimi Azərbaycan Dövlət Universitetinin Hüquq fakültəsinə vermişdim, amma qəbul olmadım. Sonra Kijəbə qəsəbəsindəki sovxoza qayıtdım və işçi kimi çalışmağa başladım. Gündüzlər təsərrüfatda çalışır, gecələr isə imtahanlara hazırlaşırdım.
Bir gün çay tarlasında çalışdığım zaman partiya təşkilat katibi Azad müəllim mənə yaxınlaşıb dedi ki, sabah Heydər Əliyev bizim sovxoza gələcək və gənclər adından çıxış etmək sənə tapşırılıb. Həqiqətən bu, mənim üçün gözlənilməz oldu. Çünki Heydər Əliyevin qarşısında çıxış etmək hər kəsə nəsib olmurdu. Səhəri gün saat 12 radələri olardı. Ümummilli Liderimiz tarla düşərgəsinə təşrif buyurdu. Gənclər adından çıxış etdim. Qəsəbəmiz, çayçılıq haqqında geniş məlumat verdim.
Çıxışım Ulu Öndərin xoşuna gəlmişdi. Məndən soruşdu ki, “Qızım sənin məqsədin, arzun nədir? Sənin kimi savadlı gənc sovxozda çayçı kimi çalışmamalıdır”. Heydər Əliyevin bir gənc kimi mənə olan diqqətindən həyəcanlanmışdım. Özümü ələ alıb Ulu Öndərə dedim ki, “Hüquqşünas olmaq istəyirəm. Ona görə də burada təcrübə toplayıram. Qayda belədir ki, sənədlərimi Hüquq fakültəsinə vermək üçün 2 il iş təcrübəsi tələb olunur”. Bu sözüm Heydər Əliyevin xoşuna gəldi. “Bəs hüquqşünas olmaqda məqsədin nədir? Prokuror olacaqsan, yoxsa hakim?” - deyə soruşdu. Dedim ki, “ədaləti qorumaq, hakim olmaq istəyirəm”. Ulu Öndər qolumdan tutaraq gülə-gülə dedi: “İnanıram ki, hüquqşünas da olacaqsan, hakim də”.
Heydər Əliyevin öyüd və nəsihətlərindən sonra üzərimdə daha çox çalışmağa başladım. Elə həmin il yüksək nəticə ilə Hüquq fakültəsinə qəbul oldum”.
Bəsti Əliyeva Ulu Öndərin hələ sovet dövründə gənclərin təhsilə cəlb olunması, bölgələrdə savadlı kadrların yetişməsi üçün gördüyü işlərdən danışarkən bildirib ki, tələbəlik illərində onunla birgə oxuyan gənclərin əksəriyyəti fəhlə və ya kəndli ailəsindən idi. “Hər birimiz savadlı, yüksək biliyə malik uşaqlar idik. Bu, Ulu Öndərin hər bir gəncin təhsilli olmaq istəyinin və bu yöndə gördüyü işlərin nəticəsi idi. O istəyirdi ki, gənclər savadlı, bilikli olsun. İndi bu siyasət Prezident İlham Əliyev tərəfindən davam etdirilir. Hər il ölkəmizin bölgələrində, ucqar kəndlərimizdə yeni-yeni məktəblər istifadəyə verilir, texniki təminat gücləndirilir”, - deyə o əlavə edib.
Bölmənin digər xəbərləri
