Beynəlxalq Dəniz Günü ilə əlaqədar tədbirlər planı hazırlanmışdır
Bakı, 22 sentyabr (AZƏRTAC). BMT-nin qərarına əsasən 1978-ci ildən etibarən hər il sentyabr ayının sonuncu həftəsi Beynəlxalq Dəniz Günü kimi qeyd olunur.
Ekologiya və Təbii Sərvətlər Nazirliyinin mətbuat xidmətindən AZƏRTAC-a bildirmişlər ki, bununla əlaqədar tədbirlər planı hazırlanmışdır. Nazirliyin əməkdaşları sentyabrın 26-dan 30-dək ictimaiyyətə su hövzələrinin zənginliyi barədə məlumat verəcək, eyni zamanda hər bir sakinə bu resursların qorunmasının vacibliyi təbliğ olunacaqdır. Bundan əlavə, Xəzər dənizinin Azərbaycana aid 955 kilometrlik sahil zolağında vətəndaşların, yerli icra strukturlarının, təhsil müəssisələrinin və KİV nümayəndələrinin iştirakı ilə iməciliklərin, “dəyirmi masa”ların keçirilməsi, həmçinin Xəzərin bioresurslarının artırılması istiqamətində hökumət tərəfindən görülmüş işlər barədə məlumat verilməsi nəzərdə tutulmuşdur.
Bu əlamətdar gün münasibətilə keçiriləcək mədəni-kütləvi tədbirlər Xəzərin ekoloji cəhətdən saflığının və davamlılığının qorunmasına, sərvətlərinin mühafizə olunmasına, eləcə də bu istiqamətdə görülən işlər barədə ictimaiyyətin maarifləndirilməsinə yönəlmişdir.
Bölmənin digər xəbərləri
