Beynəlxalq nəşr Azərbaycan aliminin elmi-ekspertiza fəaliyyətini yüksək qiymətləndirib
Bakı, 1 fevral, AZƏRTAC
İnformasiya Texnologiyaları İnstitutunun baş elmi işçisi texnika üzrə fəlsəfə doktoru, dosent Şəfəqət Mahmudova uzun illərdir “Springer Nature” nəşriyyatı ilə əməkdaşlıq edir, nəşriyyatın jurnallarında çap olunmuş məqalələrə rəylərin verilməsində yaxından iştirak edir.
İnstitutdan AZƏRTAC-a bildirilib ki, Ş.Mahmudova cari ildə nəşriyyatın “Soft Computing” jurnalında 2 məqaləyə rəy verdiyinə görə rəyçi sertifikatına layiq görülüb.
“Web of Science” platformasına daxil olan “Soft Computing” jurnalının impakt faktoru 3.732-yə (5 illik impakt faktor - 3.524 ) bərabərdir. Jurnalda “soft computing” texnologiyalarına əsaslanan sistem həllərinə həsr edilmiş problemlər öz əksini tapır. “Soft Computing” jurnalı təkamül alqoritmləri və genetik proqramlaşdırma, neyron şəbəkə sistemləri, qeyri-səlis çoxluqlar nəzəriyyəsi xaos nəzəriyyəsi və xaotik sistemlər üzrə tədqiqatların nəticələrini təqdim edir.
Qeyd edək ki, “Soft Computing” jurnalı “Scopus”, “ACM Digital Library”, “INSPEC” “DBLP” və s. beynəlxalq bazalarda indeksləşir.
Bölmənin digər xəbərləri
