Beynəlxalq Piyadalar Federasiyasının nümayəndəsi: WUF13-də “Piyada Səfirləri” proqramına start verəcəyik
Berlin, 12 may, AZƏRTAC
Bakıda keçiriləcək Ümumdünya Şəhərsalma Forumunun On Üçüncü Sessiyasına (WUF13) maraq və diqqət getdikcə artmaqdadır. Dünyanın müxtəlif ölkələrindən şəhərsalma, dayanıqlı nəqliyyat, sosial mənzil siyasəti və insan mərkəzli urbanizasiya sahəsində fəaliyyət göstərən beynəlxalq təşkilatlar, ekspertlər forumu müasir dövrün aktual mövzularının müzakirəsi baxımından mühüm qlobal platforma kimi qiymətləndirirlər. Beynəlxalq Piyadalar Federasiyası da WUF13-də iştirak edəcək qurumlar sırasındadır. Federasiyanın layihə koordinatoru Olena Kujim AZƏRTAC-a müsahibəsində Azərbaycanın şəhər inkişafı və mobillik sahəsində həyata keçirdiyi tədbirləri yüksək dəyərləndirərək, forum çərçivəsində müzakirə olunacaq məsələlər və gözləntiləri barədə fikirlərini bölüşüb.
Müsahibəni təqdim edirik:
- Siz Bakıda keçiriləcək WUF13-ə dəvət olunmusunuz. Bu barədə nə deyə bilərsiniz?
- Bu, bizim üçün çox böyük əhəmiyyət daşıyır. İlk növbədə ona görə ki, biz ötən il Azərbaycanda keçirilmiş Milli Şəhərsalma Forumuna da dəvət olunmuşduq, ölkənin şəhərlərin inkişafı və mobilliyin necə təşkil olunduğunu yenidən düşünmək istiqamətində nə qədər böyük işlər gördüyünü yaxından müşahidə etdik. Bilirik ki, Azərbaycan milli dayanıqlı nəqliyyat sistemi ilə bağlı fəaliyyət planı hazırlayıb. Ölkə tədricən avtomobil mərkəzli yanaşmadan insanyönümlü mobillik modelinə keçid edir. Bakının mərkəzində küçələrin piyada zonalarına çevrilməsi prosesi həyata keçirilir, velosiped infrastrukturu inkişaf etdirilir və ictimai nəqliyyat sisteminin təkmilləşdirilməsi istiqamətində mühüm addımlar atılır. Bütün bunlar göstərir ki, Azərbaycan şəhərlərin gələcək inkişafını yenidən düşünmək istiqamətində ciddi və ardıcıl iş aparır. Məhz buna görə də biz WUF13-ü çox böyük həvəslə gözləyirik.
- Bu kontekstdə, Azərbaycanın WUF13-ə ev sahibliyi rolunu necə qiymətləndirirsiniz?
- Hesab edirəm ki, bu tədbirin Azərbaycanda keçirilməsi son dərəcə mühümdür. Çünki Azərbaycan regionda yeni nəqliyyat infrastrukturunun inkişafı sahəsində, həqiqətən də, liderlik rolunu üzərinə götürür. Bu, sözügedən fəaliyyətə 50 il əvvəl deyil, məhz son onilliklərdə başlayan digər ölkələr üçün mükəmməl nümunə ola bilər. Heç vaxt gec olmadığını, nəzərəçarpacaq tərəqqiyə nail olmağın hər zaman mümkünlüyünü və mövcud vəziyyətin dəyişməz qalmadığını bilmək böyük ruh yüksəkliyi yaradır. Azərbaycanın şəhər inkişafının əvvəllər daha çox avtomobil mərkəzli olmasına baxmayaraq, hazırda hər şeyin mümkün olduğunu və hər zaman yaxşılığa doğru dəyişikliyin reallığını burada aydın görmək olar.
Biz, həmçinin bu forum çərçivəsində BMT ilə birlikdə yeni “Piyada Səfirləri” (Walking Ambassadors) proqramına start verəcəyik. Bu proqram vasitəsilə nəinki piyada təşkilatlarını, həm də fərdi fəalları öz şəhərlərində piyada əlçatanlığının yaxşılaşdırılması istiqamətində iş birliyinə dəvət edirik. Ümid edirik ki, bizim ilk pilot layihəmiz Azərbaycanda - Bakıda olacaq. Gözləntilərimiz, həqiqətən də, çox böyükdür.
- Bildiyiniz kimi, Azərbaycan işğaldan azad edilmiş ərazilərində böyük işlər görür, “Ağıllı şəhər”lər, “Ağıllı kənd”lər, yaşıl zonalar yaradılır. Bu barədə nə deyə bilərsiniz?
- Düşünürəm ki, Azərbaycanın həmin ərazilərə yeni imkanlar gətirməsi, eyni zamanda, bütün resursları yalnız paytaxtda cəmləməyib, hazırda ən çox diqqətə, bərpa və yenidənqurmaya ehtiyacı olan ərazilərin qayğısına qalmağa çalışması çox mühümdür. Bu, təqdirəlayiq haldır. Biz Beynəlxalq Nəqliyyat Forumunda da məhz bu məsələdən - kiçik şəhərlərin, kənd yerlərinin və xüsusilə qlobal qeyri-sabitlikdən zərər çəkmiş ərazilərin qayğısına qalmağın vacibliyindən danışdıq. Çünki ən çox dəstəyə məhz həmin ərazilərin ehtiyacı var.
- WUF13-ün şəhərlərin daha yaşanılan olmasına hansı töhfələr verəcəyini gözləyirsiniz?
- Mən, həqiqətən, ümid edirəm ki, WUF13 zamanı sosial mənzil təminatı və insan mərkəzli mənzil siyasəti haqqında müzakirə etdiyimiz hər bir məqamı, - hansı ki, bunlar insan mərkəzli mobillik olmadan qeyri-mümkündür, - biz artıq tətbiq etməyə başlayacağıq. Eyni zamanda, şəhərlərimizi daha yaşanılan etmək üçün istifadə edə biləcəyimiz konkret planlar və mexanizmlər ətrafında müzakirələr müstəvisinə keçəcəyik. Çünki vaxtımız məhduddur. Biz artıq real işə başlamalıyıq.
Bölmənin digər xəbərləri
