Azərbaycanın müasir şəhərsalma modelinin müəllifi Ulu Öndər Heydər Əliyevdir - ŞƏRH
Bakı, 12 may, AZƏRTAC
Azərbaycanın müasir şəhərsalma modeli uzunmüddətli strateji baxışa əsaslanır və bu siyasətin təməlini Ulu Öndər Heydər Əliyev qoyub. Onun rəhbərliyi dövründə şəhərsalma yalnız tikinti prosesi kimi deyil, milli kimliyin, mədəniyyətin və müasir inkişafın mühüm hissəsi kimi qiymətləndirilib.
Bu sözləri AZƏRTAC-a açıqlamasında Bakı Dövlət Universitetinin kafedra müdiri, professor Kamilə Əliyeva söyləyib.
O bildirib ki, ötən əsrin 60-70-ci illərində Bakı planlı inkişaf mərhələsinə qədəm qoydu. Yeni yaşayış massivləri salındı, nəqliyyat və sosial infrastruktur genişləndirildi, şəhərin yaşıllıq və ictimai məkanları artırıldı. Gülüstan Sarayı, Heydər Əliyev Sarayı və Bakı Dövlət Sirki kimi memarlıq nümunələri şəhərin simasını dəyişdi.
"Müstəqillik illərində Heydər Əliyevin rəhbərliyi ilə şəhərsalma siyasəti yeni mərhələyə keçdi. “Əsrin müqaviləsi” nəticəsində ölkəyə daxil olan investisiyalar Bakının müasir biznes və diplomatik mərkəzə çevrilməsinə şərait yaratdı. Tarixi irsin qorunması da prioritet oldu. İçərişəhərin UNESCO siyahısına daxil edilməsi istiqamətində görülən işlər və Bibiheybət məscidinin yenidən qurulması bunun nümunəsidir",- deyə K.Əliyeva vurğulayıb.
Professor əlavə edib ki, Heydər Əliyevin şəhərsalma siyasəti üç əsas prinsipə söykənirdi: milli memarlıq üslubunun qorunması, şəhərlərin sistemli planlaşdırılması və uzunmüddətli strateji inkişaf. Bu prinsiplər bu gün də Azərbaycanın şəhərsalma siyasətində əsas istiqamət kimi qalır.
Hazırda Prezident İlham Əliyevin rəhbərliyi ilə bu strategiya yeni innovativ yanaşmalarla davam etdirilir. “Ağıllı şəhər” və “Ağıllı kənd” layihələri, yaşıl enerji və rəqəmsal idarəetmə sistemləri müasir şəhərsalma siyasətinin əsas elementlərinə çevrilib. Qarabağ və Şərqi Zəngəzurda həyata keçirilən yenidənqurma işləri isə Azərbaycanın yeni şəhərsalma modelini nümayiş etdirir. Ağalı kəndi və Şuşanın bərpası bu siyasətin uğurlu nümunələri hesab olunur.
"Bakı bu gün yalnız Azərbaycanın paytaxtı deyil, həm də beynəlxalq şəhərsalma mərkəzlərindən birinə çevrilib. Azərbaycanın WUF13 forumuna ev sahibliyi etməsi isə Heydər Əliyev tərəfindən əsası qoyulan şəhərsalma strategiyasının uğurlu və davamlı inkişafının məntiqi nəticəsidir",- deyə o bildirib.
Bölmənin digər xəbərləri
