Beynəlxalq təşkilatlar, böyük dövlətlər rəsmi Bakının sülhpərvər siyasətinə ciddi dəstək göstərməlidirlər - RƏY
Bakı, 25 aprel, AZƏRTAC
Prezident İlham Əliyev aprelin 23-də ADA Universitetində təşkil olunan “COP29 və Azərbaycan üçün Yaşıl Baxış” mövzusunda beynəlxalq forumda çıxışında Fransa, Hindistan və Yunanıstanın Ermənistanı silahlandırmasına diqqət çəkib. Dövlətimizin başçısı çıxışında Ermənistanla yanaşı, ermənipərəst qüvvələrə xəbərdarlıq edib, lazım gəldiyi anda Azərbaycanın qabaqlayıcı addımlar atacağını bildirib.
Mövzu ilə bağlı AZƏRTAC-a açıqlama verən Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bildirib ki, Prezidentin bu bəyanatı Ermənistan və ona himayədarlıq edən qüvvələrə növbəti xəbərdarlıqdır.
“Prezident İlham Əliyev “COP29 və Azərbaycan üçün Yaşıl Baxış” mövzusunda beynəlxalq forumda çıxışında bir çox məsələ ilə yanaşı, Ermənistanın silahlandırılmasına da diqqət çəkdi. Dövlətimizin başçısı açıq şəkildə Fransa, Yunanıstan və Hindistanın Ermənistanı silahlandırmasını tənqid etdi, Azərbaycanın bu prosesə sona qədər seyrçi qalmayacağını vurğuladı. Prezident qeyd edib ki, əgər Azərbaycan özü üçün ciddi təhdid görsə, o zaman konkret addımlar atacaq”.
C.Xəlilovun sözlərinə görə, İrəvan anlamalıdır ki, bu gün ona zirehli texnikalar, raket sistemləri verən, öz hərbi müşavirlərini bu ölkəyə göndərən dövlətlərin məqsədi heç də Ermənistana yardım etmək, onun hərbi baxımdan möhkəmlənməsinə kömək göstərmək deyil: “Bu dövlətlərin məqsədi Ermənistanı qurban vermək hesabına regiondakı maraqlarını təmin etmək, bölgədə möhkəmlənmək, daha çox siyasi-iqtisadi qazanc əldə etməkdir. Əgər gələcəkdə bölgədə yeni qarşıdurma olsa, Prezident İlham Əliyevin dediyi kimi, həmin qüvvələr elə ilk güllə atılanda Ermənistanı taleyin ümidinə buraxacaq, atıb qaçacaqlar.
Buna görə də Ermənistan onu qarşıdurmaya, gərginliyə sövq edən bu qüvvələrdən, onların hərbi yardımlarından imtina etməli, Azərbaycanın sülh səylərini dəstəkləməlidir. Yalnız belə olan halda Ermənistan öz təhlükəsizliyini və inkişafını təmin edə bilər”.
Polkovnik Cəlil Xəlilov beynəlxalq təşkilatları, dünyanın digər aparıcı dövlətlərini regionda uzunmüddətli sülh və təhlükəsizliyin təmininə töhfə verməyə səsləyib: “Azərbaycanın regionda sülhün və təhlükəsizliyin təmin olunmasında gördüyü işlər, ortaya qoyduğu səy və təşəbbüslər hər kəsə məlumdur. Ölkəmiz həm 44 günlük müharibədən əvvəl, həm də postmüharibə dövründə bu istiqamətdə böyük işlər görüb. Lakin regionda və dünyamızda sülhün bərqərar olmasında beynəlxalq təşkilatlar, böyük dövlətlər də fəal rol oynamalı, rəsmi Bakının, Prezident İlham Əliyevin sülhpərvər siyasətinə ciddi dəstək göstərməlidirlər. Yalnız bu halda biz regionda etibarlı və uzunmüddətli sülhə nail ola bilərik”.
Bölmənin digər xəbərləri
