Beynəlxalq Türk Akademiyası Xocalı soyqırımının 30-cu ildönümü ilə bağlı bəyanat yayıb
Nur-Sultan, 26 fevral, AZƏRTAC
Beynəlxalq Türk Akademiyasının prezidenti Darxan Kıdırali Xocalı soyqırımının 30-cu ildönümü ilə bağlı bəyanat yayıb.
AZƏRTAC xəbər verir ki, bəyanatda Azərbaycanın Xocalı şəhərində 1992-ci il fevralın 26-da azərbaycanlı mülki əhaliyə qarşı törədilmiş dəhşətli soyqırımı aktı nəticəsində əksəriyyəti uşaq, qadın və yaşlı olmaqla 613 nəfərin xüsusi amansızlıq və işgəncə ilə qətlə yetirildiyi, insanlıq tarixinə ləkə olan ən qanlı faciələrdən birinin baş verdiyi bildirilib.
Bəyanatda qeyd olunub: “Beynəlxalq Türk Akademiyası olaraq, Xocalı faciəsinin 30-cu ildönümündə qardaş Azərbaycan xalqının üzüntüsü və kədərini bölüşür, bütün insanlığa qarşı yönəlmiş bu cinayət aktını lənətləyirik. Belə cinayətlərin bir daha təkrarlanmaması üçün beynəlxalq ictimaiyyəti bu amansız vəhşəti qınamağa, baş verənlərə obyektiv hüquqi qiymət verməyə çağırırıq.
Bununla yanaşı, “Xocalıya ədalət!” beynəlxalq kampaniyasını dəstəklədiyimizi bəyan edir, faciə zamanı dünyasını dəyişən bütün şəhidlərimizi dərin hüznlə anır, Azərbaycan dövləti və xalqı ilə həmrəy olduğumuzu bildiririk”.
İlahə Əhmədova
AZƏRTAC-ın xüsusi müxbiri
Nur-Sultan
Bölmənin digər xəbərləri
