Biləsuvarlı fermerlər pambıq sahələrindən 50 sentnerdən çox məhsuldarlıq əldə ediblər VİDEO
Biləsuvar, 24 noyabr, İsmayıl Cəfərli, AZƏRTAC
Respublikamızda pambıqçılıq rayonu kimi tanınan Biləsuvarda bu il təsərrüfat adamları 6 min 745 hektara yaxın sahədə keyfiyyətli pambıq yetişdiriblər.
AZƏRTAC xəbər verir ki, sentyabr ayından başlayaraq bu günədək rayonun pambıq tarlalarından 16 min tondan çox yüksək keyfiyyətli məhsul tədarük edilib. Yığım qabağı yağmurlu keçən hava şəraiti istehsalçılara ciddi maneələr yaratsa da, hədəfə nail olmaq üçün bütün imkanlardan istifadə edilir. Nəticələrə nəzər saldıqda, müəssisələr arasında orta məhsuldarlıq hələlik 27-28 sentner olsa da, fərdi şəkildə bir çox fermer hətta 50 sentnerdən yuxarı məhsuldarlıq əldə etməklə rekorda imza atıb.
Onlardan biri də rayonun Əmənkənd kəndindən olan fermer Elxan Hüseynovdur. O, bu il 10 hektar sahədə pambıq əkib, birinci yığımda 49 ton 950 kiloqram pambıq təhvil verib. “Bir-iki günə sahəmizdə ikinci yığım həyata keçiriləcək. Oradan da azı 10 ton pambıq götürmək niyyətindəyik, 65 sentner pambıq verəcəyəm”, - deyə o bildirib.
Hazırda tarlalarda məhsul yığımı davam edir. Məhsul məntəqələrə gətirilərək, tayalar düzəldilir. Tayalara vurulan pambıq sortuna görə 4 növə bölünür.
“P-aqro” pambıq məntəqəsinin əməkdaşı Rəhim Kazımov da sahədə bol məhsulun olduğunu söyləyir. Deyir ki, birinci yığım sahəsi 200 hektardan çoxdur, ikinci yığımda isə 600 hektardan yuxarı sahənin məhsulu toplanılacaq: “Fermerlərimiz bu il böyük fəallıq göstərirlər. 50-dən yuxarı fermerimiz indiki göstəricilərə görə 40-50 sentnerdən çox məhsul toplayıb, məhsul yığımı davam edir. Bu il orta məhsuldarlığın 30-35 sentner olmasını gözləyirik”.
Rayonda fermerlərin pambıq istehsalına marağının artması bu sahəni daha da rentabelli hala gətirib. Xüsusən pambıqçılığın son illərdəki inkişafı məhz dövlət dəstəyinin genişləndirilməsi, eləcə də tədarükçü şirkətlərin məhsulun alış qiymətinə etdiyi artımlar hesabına baş verib. Hazırda müəssisələrin istehsal etdiyi mahlıc keyfiyyətinə görə xarici bazarlarda da yüksək qiymətləndirilir.
Biləsuvar Dövlət Aqrar İnkişaf Mərkəzinin direktoru Nurəddin Quliyev bildirib ki, pambığın ikinci yığımı öncəsi fermerlərə tövsiyə və məsləhətlərini veriblər: “Pambığın son qozasınadək yığılması nəzərdə tutulub. Bununla bağlı fermerlər arasında məsləhətləşmə aparılıb, tövsiyə verilib ki, onlar pambıq yığımını tam şəkildə başa çatdırsınlar. Bununla da əvvəlki illərdə nail olduğumuz nəticəyə, 30 sentnerə çatmaq hədəfimiz yerinə yetirilmiş olacaq”.
Bu günədək rayonda tədarük olunaraq müəssisələrə təhvil verilən məhsulun 95 faizi birinci növ kimi qəbul edilib. Pambığın təxminən 80 faizdən çoxu müasir kombaynlarla toplanılıb.
Bölmənin digər xəbərləri
