BİLL GEYTS VƏ ONUN XANIMI “İLİN ADAMLARI” SEÇİLMİŞLƏR

20.12.2005 [12:32]
Çap et
A⁺ A^-

AZƏRTAC xarici informasiya agentliklərinə istinadla xəbər verir ki, ABŞ-ın nüfuzlu “Tayms” həftəliyi tanınmış rok musiqiçi Bononu, “Maykrosoft” korporasiyasının təsisçilərindən biri Bill Geytsi və onun xanımı Melindanı “İlin adamları” adlandırmışdır. Seçim zamanı onların yoxsulluqla mübarizəyə, tibbi xidmətin qlobal miqyasda yaxşılaşdırılmasına yönəldilmiş xeyriyyəçilik və ictimai fəaliyyəti başlıca amil kimi götürülmüşdür.

Jurnalın yazdığına görə, 2005-ci ildə varlı insanlar təbii fəlakətlərdən, o cümlədən Sakit okeanda baş vermiş sunamidən və “Katrina” qasırğasından zərər çəkənlərə yardım məqsədi ilə rekord məbləğdə ianə vermişlər. Jurnalın idarəçi redaktoru Cim Kelli demişdir: “Təbii fəlakətlər nə qədər dəhşətli olsa da, dünyada yoxsulluq kimi müdhiş problemi də mövcuddur. Bu problemi Bill və Melinda Geyts və Bonodan yaxşı həll etməyə səy göstərən yoxdur”.

“Maykrosoft” korporasiyasının təsisçilərindən biri və onun xanımı “Bill və Melinda Geytslər Fondu” yaratmışlar. 29 milyard dollar vəsaiti olan fond dünyanın ən yoxsul ölkələrində vaksinləşdirmə proqramını həyata keçirmiş, kitabxanalara və tələbələrə yardım göstərmişdir.

Bono bu il dünyanın ən varlı ölkələrinin liderlərinin yoxsul dövlətlərin 40 milyard dollar məbləğində borcunu bağışlamasına nail olmuşdur.