“BİR MİLLƏT, İKİ DÖVLƏT QÜRURUMUZ” ADLI ƏDƏBİ-BƏDİİ HƏMRƏYLİK GECƏSİ KEÇİRİLMİŞDİR

15.09.2006 [23:38]
Çap et
A⁺ A^-

AZƏRTAC xəbər verir ki, sentyabrın 15-də Heydər Əliyev adına Sarayda 1918-ci ildə Nuru Paşanın komandanlığı altında Türk Qafqaz İslam Ordusunun Bakını işğaldan azad etməsinin 88-ci ildönümünə həsr olunmuş “Bir millət, iki dövlət qürurumuz” adlı ədəbi-bədii həmrəylik gecəsi keçirilmişdir.

Gecəni “Ergenekon” Türk Dünyası Araşdırmaları Mərkəzi və Tərxis Olunmuş Hərbçilərin Gəncləri Maarifləndirmə İctimai Birliyi təşkil etmişdir.

Əvvəlcə Azərbaycanın və Türkiyənin dövlət himnləri səslənmişdir.

Mərkəzin İdarə Heyətinin sədri Şöhrət Eyvazlı, birliyin sədri Emin Həsənli, Mədəniyyət və Turizm Nazirliyinin şöbə müdiri Fikrət Babayev, Türkiyənin ölkəmizdəki səfirliyinin mədəniyyət və tanıtma müşaviri Fethi Gedikli 1918-1920-ci illərdəki tarixi hadisələr, Bakının işğaldan xilas edilməsi uğrunda öz canını qurban verən şəhidlərin qəhrəmanlığından danışmışlar.

İki qardaş və dost ölkənin musiqiçiləri - Aşıq Sefai, əməkdar artist Azərin, Aşıq Ədalət və başqaları maraqlı konsert proqramı ilə çıxış etmişlər.