Birinci Qarabağ müharibəsinin itkin şəhidi Abdulla Quliyev dəfn edilib VİDEO
Bakı, 28 oktyabr, AZƏRTAC
Oktyabrın 28-də Birinci Qarabağ müharibəsində itkin düşmüş hesab edilən və nəşinin qalıqları 33 il sonra tapılan şəhid Abdulla Novruz oğlu Quliyevin dəfn mərasimi keçirilib.
AZƏRTAC xəbər verir ki, Abşeron rayonunun Saray qəsəbəsindəki qəbiristanlıqda təşkil olunan mərasimdə mərhumun yaxınları, dövlət və ictimaiyyət nümayəndələri iştirak ediblər.
Dəfn mərasimində şəhidlərimizin ruhuna dualar oxunub, xalqımıza və dövlətimizə sülh və əmin-amanlıq arzulanıb, şəhidin məzarına tər güllər düzülüb, əklil qoyulub.
Mərasim zamanı itkin şəhidin qardaşı Əhəd Abdulla haqqında xatirələrini bölüşərkən deyib: “Bu gün bizim üçün həm kədərli, həm də qürurverici gündür. 33 il əvvəl Birinci Qarabağ müharibəsində itkin düşmüş hesab edilən, bu gün isə nəşi tapılaraq Vətən torpağına tapşırılan qardaşımın ruhu qarşısında baş əyirəm. O illər çox çətin idi. Hər şey gözlənilmədən baş verdi. Müharibənin yaratdığı qarışıqlıq, məlumat çatışmazlığı səbəbindən biz uzun illər onun taleyindən xəbər tuta bilmədik. Lakin Vətənimizin güclənməsi, dövlətimizin apardığı məqsədyönlü siyasət nəticəsində bu gün şəhidimizin nəşinə qovuşduq. Allah dövlətimizi və Ordumuzu qorusun. Qardaşım Abdulla sadə, lakin qürurlu bir insan idi. O, Vətəni hər şeydən üstün tuturdu. Ailəmiz üçün böyük bir dayaq, el-obamızdan ötrü isə əsl mərdlik nümunəsi idi. Onun yoxluğu illərlə qəlbimizdə böyük bir yara kimi qaldı. Bu illər ərzində çox əzablar, sınaqlar gördük. Lakin bu gün, 33 il sonra onun şəhid kimi torpağa qovuşması bizim üçün həm təsəlli, həm də qürur mənbəyidir. Qardaşımın ruhu artıq rahatdır, çünki Vətən torpaqları azaddır. Mən bütün şəhid ailələrinə səbir, qazilərimizə isə sağlamlıq arzulayıram. Qardaşımın xatirəsi bizim üçün hər zaman müqəddəs olacaq”.
İtkin şəhidin bacısı Xədicəxanım Əliyeva mərasimdə çıxış edərək qardaşı haqqında xatirələrini bölüşüb. O, qardaşının məsuliyyətli, mərd və fədakar bir insan olduğunu qeyd edib: “Abdulla uşaqlıqdan cəsarətli, qayğıkeş və vətənpərvər idi. Mən onun necə böyüdüyünü, necə formalaşdığını gözlərimlə görmüşəm. Elə bil ki, o, Vətən üçün doğulmuşdu. O, könüllü şəkildə müharibəyə yollandı. Anamız ona “getmə” desə də, Abdulla demişdi ki, əgər mən getməsəm, kim gedəcək, beləcə, heç bir tərəddüd etmədən cəbhəyə yola düşdü”.
O bildirib ki, Abdulla onun üçün təkcə qardaş deyil, həm də mənəvi dayaq olub. “Onun itkisi bütün ailə üçün ağır zərbə olub. Lakin şəhid kimi xatırlanması bu ağrını bir qədər yüngülləşdirir. Müharibənin ilk günlərində onun haqqında xəbər ala bilmədik. Hər gün ümidlə gözləyirdik. Mən bir gecə yuxuda onu gördüm, əlimi tutdu, barmağımı sıxdı. O an anladım ki, artıq bizdən uzaqlaşıb. Üç gün sonra isə xəbər gəldi: Abdulla şəhid olub. O, yaralı vəziyyətdə döyüş meydanında qalıb, amma son ana qədər döyüşüb. Bu gün isə onun ruhu rahatdır, çünki uğrunda döyüşdüyü torpaqlar azaddır. Dövlətimizə, Ordumuza və şəhidlərimizin ruhuna borcluyuq. Hər kəsin diqqəti, qayğısı bizim üçün böyük təsəllidir”, - deyə o diqqətə çatdırıb.
Şəhidin bacısı Sevda İsayeva da mərasimdə çıxış edərək, uzun illər qardaş həsrəti ilə yaşamağın ağrısını, eyni zamanda, onun nəşinə qovuşmağın yaratdığı təsəllini dilə gətirib: “Tam 33 il qardaşımın itkin olması xəbəri ilə yaşadıq. Bu illər bizim üçün həm ağrılı, həm də ümidsiz idi. Gözlərimiz daim yolda, qulaqlarımız səsdə idi. Hər qapı döyüldükdə ümid edirdik ki, bəlkə Abdulla qayıdacaq. Bu hissi yalnız itkin ailələri anlayarlar”.
O deyib ki, qardaşının nəşinin tapılması və şəhid kimi torpağa tapşırılması ailə üçün böyük mənəvi rahatlıq gətirib: “Çox şükürlər olsun ki, Müzəffər Ali Baş Komandanımızın, Ordumuzun, şəhidlərimizin və qazilərimizin sayəsində torpaqlarımız azad olundu. Qardaşımın da qanı yerdə qalmadı. Bu gün bizim üçün kədərin içində təsəlli günüdür. Çünki gedib baş əyməyə, dua etməyə, çiçək qoymağa bir məkanımız var. Allah bütün şəhidlərimizə rəhmət eləsin, ruhları şad, məkanları cənnət olsun! Qardaşım Abdulla, rahat yat! Sənin canından, qanından keçib, azad etdiyin torpaqlar bu gün bizimdir. Sənin ruhun artıq azad Qarabağın üzərində dolaşır. Qürur duyuruq ki, sən bu Vətənin qəhrəman oğullarındansan”, - deyə o vurğulayıb.
Sevda İsayeva dövlət tərəfindən şəhid ailələrinə göstərilən qayğıya görə minnətdarlığını ifadə edib.
Qeyd edək ki, şəhid A. Quliyev 1968-ci il oktyabrın 26-da Göyçay rayonunda anadan olub. O, Birinci Qarabağ müharibəsində döyüşlərdə iştirak edib və 1992-ci il mayın 8-də Şuşa şəhərində itkin düşdüyü güman olunurdu. A. Quliyev Birinci Qarabağ müharibəsində itkin düşmüş hesab edilən və şəxsiyyətləri müəyyənləşdirilərək bu gün dəfn olunan üç şəhiddən biridir.
Bölmənin digər xəbərləri
