“Bizim də bu ildən gözləntilərimiz böyükdür” - dovşançılıq təsərrüfatının rəhbəri FOTO VİDEO
Dovşan ili insanlara rahatlıq, xoşbəxtlik və sevgi gətirəcək
Xaçmaz, 2 yanvar, Elxan Yusifli, AZƏRTAC
Çin təqviminə əsasən, 2023-cü il Dovşan ilidir. Bəzən buna Qara Su dovşanı da deyilir. Qədim əfsanələrə görə, Dovşan ili Şərq simvolları arasında xüsusi yer tutur. Astrologiyaya əsasən, dovşan bütün bürclərə stabillik, rahatlıq, xoşbəxtlik və ən əsası sevgi gətirəcək. Çünki özü romantikanı çox sevir. Ulduzlar deyir ki, bu il qorxu, həyəcan ili olmayacaq. Yaşadığımız gərginliklər də başa çatmaqda olan Mavi pələng ilində qalacaq.
AZƏRTAC-ın bölgə müxbiri 2023-cü ilin adını daşıdığı dovşan təsərrüfatında olub, fermerlə bu heyvanın özəllikləri barədə maraqlanıb.
Xaçmazlı təsərrüfatçı Oleq Fomoviç 40 ilə yaxındır dovşan saxlayır. Əvvəllər bu heyvanları maraq üçün bəsləsə də, sonradan hobbisini gəlir mənbəyinə çevirib.
Oleq Fomoviç dovşanları Xudat şəhəri yaxınlığındakı təsərrüfatında bəsləyir. Hazırda təsərrüfatındakı müxtəlif sort dovşanların sayı 100-dən çoxdur. Bu sayı 2-3 dəfə artırmaq imkanı da var.
“Burada 10-a yaxın dovşan növü var. Kaliforniya, Velikan, Vlandır, xaricdən gətirilmiş ağ və qırmızı Rizel kimi ətlik dovşan növlərinə üstünlük verirəm. Dovşanlar satış üçün nəzərdə tutulub. 3-4 aylıq dovşan 2 kiloqram ət verir”, - deyə təsərrüfatçı bildirib.
Oleq hələ 7 yaşı olanda dovşan saxlamağa başlayıb. Uşaq vaxtı dayısının təsərrüfatından götürdüyü yerli sort dovşanları bəsləyib. Amma son 20 ildir ancaq cins heyvanlar saxlayır və təsərrüfatından gəlir əldə edir: “Pandemiya dövrünə qədər dovşan əti satışı yaxşı idi. Yetişdirdiyimiz heyvanların ətini Xaçmazdan, Bakıdan olan müştərilərimiz topdansatış qiymətə alırdılar. Onlar da müxtəlif şirkətlərə verirdilər. Amma son iki ildə dovşan ətinə maraq çox azalıb. Regiondakı dovşan təsərrüfatlarının əksəriyyəti fəaliyyətini dayandırıb. Dovşan saxlamaq çətin deyil. Amma satışını təşkil edə bilməyəndən sonra saxlamağa dəyməz”.
Dovşan əti yağsız, xolesterinsiz olduğu üçün dietikdir. Şəkər xəstəliyi olanlar, pəhriz saxlayanlar dovşan ətinə üstünlük verir.
Oleq Fomoviç deyir ki, dovşanlar ən artımlı heyvanlardan sayılır. Bu heyvanlar növündən asılı olaraq hər ay 8-10 bala verir. Dörd aylığında isə ət istehsalına verilir.
Dovşanların xəstəliklərə yoluxmasının qarşısını almaq üçün daim baytarlarla məsləhətləşmək lazımdır. Bu heyvanların yem rasionunu arpa, buğda, qarğıdalı, günəbaxan toxumu və yonca təşkil edir.
“2023-cü il Çin təqviminə görə dovşan ilidir. Bizim də bu ildən gözləntilərimiz böyükdür. Ümid edirəm ki, dovşançılıq təsərrüfatlarının müştəriləri artar. Çoxları dovşanları xarakterizə edərkən yalnız cəldliyinə diqqət çəkir. Amma bildirim ki, dovşanlar bərəkətli, artımlı heyvanlardır. Bu heyvanlar öz balalarına qarşı çox həssasdırlar. Sahibini tanıyırlar. Bir sözlə, çox gözəl və xeyirli heyvandır. İnşallah, ilk günlərini yaşadığımız yeni il də xeyirli, bərəkətli olar”, - deyə xaçmazlı təsərrüfatçı söyləyib.
Qeyd edək ki, astrologiyaya görə, Dovşan ilində anadan olanlar parlaq fərdi keyfiyyətlərə malik olurlar. İstedadlı və şöhrətpərəst, xeyirxah və təmkinlidirlər, incə zövqləri ilə fərqlənirlər. Hamını heyran qoyur və etimad qazanırlar. Bu adamlar bəzən qeybət etməyi xoşlayırlar, lakin nəzakətlidirlər, hirsli deyillər. Sevdikləri ilə incə rəftar edirlər, yaxın qohumları ilə çox nadir hallarda sıx əlaqə saxlayırlar. Demək olar ki, heç vaxt qızışıb özlərindən çıxmırlar, gözəl işgüzar keyfiyyətlərə malikdirlər. Vicdanlı və sözü bütövdürlər, bəzən xırdaçı və vasvası olur, bəzən qəmginləşirlər. Əla oyunçu ola bilərlər, lakin mühafizəkar və ehtiyatlı olduqlarına görə nadir hallarda oynayırlar.
Bölmənin digər xəbərləri
