Bizim hər bir addımımız bölgədə sülh və əmin-amanlığa xidmət edir
Bakı, 30 avqust, AZƏRTAC
Azərbaycan Qızıl Aypara Cəmiyyəti (AzQAC) 103 ildir ki, humanitar fəaliyyət göstərir. Cəmiyyət həm münaqişə, həm sülh, həm də fövqəladə hadisələr zamanı yardıma ehtiyacı olanların köməyinə çatır və onlara müxtəlif yardımlar göstərir. Bu, bizim cəmiyyətin əsas missiyasıdır. Biz həm cəmiyyətin Nizamnaməsinə, həm də Azərbaycan Qızıl Aypara Cəmiyyəti haqqında Qanuna uyğun olaraq həmin fəaliyyəti həyata keçiririk.
Bunu AZƏRTAC-a Azərbaycan Qızıl Aypara Cəmiyyətinin vitse-prezidenti Qafar Əsgərzadə Qızıl Aypara Cəmiyyəti tərəfindən 40 ton un məmulatlarından ibarət humanitar yardımın Ağdam-Xankəndi yolu ilə Qarabağda yaşayan erməniəsilli şəxslərə çatdırmaq üçün yola salınmasını şərh edərək bildirib.
“Qarabağ iqtisadi zonasında yaşayan erməni milliyyətindən olan əhali ölkəmizin sakinləridir və AzQAC dinindən, irqindən və siyasi əqidəsindən asılı olmayaraq hər kəsə yardım göstərir və bu sahədə müəyyən layihələr həyata keçirir. AzQAC-ın İdarəetmə Şurası avqustun 21-də həmin bölgədə yaşayan dinc erməni sakinlərinə yardım göstərməyə hazır olduğunu bildirdi. Qızıl Aypara Cəmiyyətinin bu addımı həm Beynəlxalq Qızıl Xaç və Beynəlxalq Qızıl Aypara Cəmiyyətləri Federasiyasının Nizamnaməsinə, eləcə də Cenevrə konvensiyasına və Sevilya razılaşmasının tələblərinə tam uyğundur. Cəmiyyətin əməkdaşları və könüllülərin müşayiəti ilə 40 ton un məmulatından ibarət iki tır maşını Xankəndinə yola salınıb”.
Qafar Əsgərzadə avqustun 21-də cəmiyyətin verdiyi bəyanata qarşı tərəfin cavabından bəhs edərək deyib: “Bir gün sonra Ermənistan Qızıl Xaç Cəmiyyəti öz saytında buna cavab olaraq bu xoş məramı dəstəkləmək əvəzinə bizim ünvanımıza həqiqətə uyğun olmayan fikirlər səsləndirərək bizi siyasətə qarışmaqda və hərəkatı neytrallıq prinsipini pozmaqda ittiham etdilər. Əlbəttə, bu fikirlər tamamilə yanlışdır. AzQAC ölkə ərazisində istənilən humanist missiyanı həyata keçirməyə tam səlahiyyətlidir və bunun üçün mandatı var. Humanitar missiyanı həyata keçirərkən heç bir qurum Qızıl Aypara Cəmiyyətinin işinə müdaxilə edə bilməz. Cəmiyyətin bu fəaliyyətinə kölgə salmaq məqsədi daşıyan Ermənistan Qızıl Xaç Cəmiyyətinin cavabı təəccüb və təəssüf doğurur. Otuz il ərzində Qarabağ bölgəsindən 1 milyona yaxın qaçqın və məcburi köçkünün olması, onlara verilən fiziki əzab və işgəncələr, tarixi və dini abidələrin məhvi və digər bu kimi hallara münasibət bildirməyən Ermənistan Qızıl Xaç Cəmiyyəti belə bir humanitar addımın müqabilində verdiyi bəyanatla özü-özünü ifşa etdi və özlərinin siyasətə qarışdığını nümayiş etdirdi. Xüsusilə də Xocalı rayonunun Meşəli kəndində dinc sakinlərə olmazın divan tutan Vaqif Xaçaturyan kimi qatil və terrorçunu müdafiə etməsi Ermənistan Qızıl Xaç Cəmiyyətinin mövqeyini açıq-aydın göstərir. Doğrudur, bəzi beynəlxalq qurumlar da bu məsələdə erməni təbliğatına züy tuturlar, lakin bunların heç bir əsası yoxdur. Bu gün Azərbaycanda, konkret Qarabağda heç bir humanitar böhran və müharibə şəraiti yoxdur və tam əmin-amanlıqdır. İndiki şəraitdə Azərbaycan Qızıl Aypara Cəmiyyəti ölkəmizdə yaşayan insanlara istənilən formada yardım göstərməyə hazır olan bir təşkilatdır, çünki bu, bizim missiyamız və borcumuzdur”.
Qafar Əsgərzadə fikrini yekunlaşdıraraq deyib: “Azərbaycan Qızıl Aypara Cəmiyyəti Beynəlxalq Qızıl Xaç və Qızıl Aypara Cəmiyyətləri Federasiyası ilə birlikdə qiymətləndirmə apara bilər və Xankəndidə tam təhlükəsiz şərait yarandığı zaman qiymətləndirməyə uyğun olaraq nəyə ehtiyac duyulursa, orada yaşayanlara yardım göstərmək imkanına malik olacaq. Ümid edirik ki, bizim bu humanist addımımız beynəlxalq təşkilatlar və yerli ictimaiyyət tərəfindən düzgün qiymətləndiriləcək, çünki bizim hər bir addımımız bölgədə sülh və əmin-amanlığa xidmət edir”.
Bölmənin digər xəbərləri
