BMT eksperti: Azərbaycan beynəlxalq platformalarda etibarlı tərəfdaş mövqeyi nümayiş etdirir
Bakı, 15 may, AZƏRTAC
Bakıda təşkil olunan BMT-nin Ümumdünya Şəhərsalma Forumunun 13-cü Sessiyası (WUF13) mühüm əhəmiyyətə malikdir. Bu Forum dayanıqlı şəhər gələcəyinin qurulması istiqamətində aparılan birgə səylər üçün vacib dönüş nöqtəsidir. 2016-cı ildə Kito şəhərində BMT tərəfindən qəbul edilən New Urban Agenda (Yeni Şəhər Gündəliyi) müəyyən edilən hədəflərin real həyat şəraitində nə dərəcədə tətbiq olunduğunu qiymətləndirən qlobal hesabatlılıq məkanıdır. Mənzil bərabərsizliyi, iqlim riskləri, texnoloji transformasiya, miqrasiya təzyiqləri və sosial qeyri-bərabərliklərin artdığı bir dövrdə WUF13 bəyanatlardan konkret fəaliyyət mərhələsinə keçid üçün imkan yaradır.
Bu sözləri AZƏRTAC-a BMT-nin Uşaqlar və Gənclər üzrə Əsas Qrupunun eksperti Zipporah Njenga söyləyib.
“Yeni Şəhər Gündəliyinin qəbulundan ötən onillik dövrün icmalı artıq gündəmdədir. Qəbul edilən bu sənəddən sonra şəhərsalma mənzərəsi ciddi şəkildə dəyişib. Sürətli şəhərləşmə prosesi davam etdiyi kimi, qeyri-formal yaşayış məntəqələri, məcburi köçürülmə halları, infrastruktur çatışmazlığı və şəhər bərabərsizliyi də genişlənməkdədir. Paralel olaraq rəqəmsal transformasiya və “ağıllı şəhər” modelləri şəhərlərin idarəetmə və inkişaf mexanizmlərini yenidən formalaşdırır. Lakin “ağıllı şəhər” anlayışı yalnız texnoloji yeniliklərlə məhdudlaşmır, eyni zamanda, insan mərkəzli, iqlimə davamlı və hər kəs üçün əlçatan şəhərlərin qurulmasıdır. Rəqəmsal innovasiyalar bərabər xidmət imkanlarının genişləndirilməsinə, iştirakçı idarəçiliyin gücləndirilməsinə və dayanıqlı sistemlərin qurulmasına xidmət etməlidir; əks halda onlar sosial kənarlaşdırma və nəzarət mexanizminə çevrilə bilər. Bu baxımdan forum “ağıllı şəhərlər” ədalət, davamlılıq və şəhər hüquqları ilə necə uzlaşdırılacağını ciddi şəkildə müzakirə etməlidir”, - deyə Z.Njenga qeyd edib.
Ekspertin sözlərinə görə, Azərbaycanın WUF13-ə ev sahibliyi etməsi mühüm qərardır və bu təşəbbüs yüksək qiymətləndirilməlidir. Tədbirə sədrlik edən ölkə xüsusilə mənzil təhlükəsizliyinin əsas problemlərindən birinə çevrildiyi dövrdə mühüm məsuliyyət daşıyır. Bu məsələ yalnız yaşayış məkanı deyil; o, sağlamlıq, insan ləyaqəti, iqlim dayanıqlılığı, təhsil və iqtisadi imkanlarla bağlıdır. Azərbaycanın bu liderlik rolunu üzərinə götürməsi müsbət qiymətləndirilir. Forumdakı müzakirələrin inklüziv, uzaqgörən və səmərəli şəkildə aparılacağına inam yaradır.
“Bakının son illərdə nüfuzlu beynəlxalq tədbirlərə uğurla ev sahibliyi etməsi şəhərin qlobal platformalardakı mövqeyini daha da gücləndirir. Xüsusilə COP29 çərçivəsində əldə olunan təcrübə Azərbaycanın iqlim gündəliyi, davamlı inkişaf və beynəlxalq əməkdaşlıq sahələrində fəal və etibarlı tərəfdaş olduğunu bir daha nümayiş etdirib. Həmin dövrdə Bakıda müşahidə etdiyim yüksək təşkilati imkanlar, açıq və inklüziv dialoq mühiti, eləcə də müxtəlif tərəflər arasında qurulan əməkdaşlıq məndə olduqca müsbət təəssürat yaratdı. Bu, Azərbaycanın qlobal çağırışların həllinə töhfə vermək istiqamətində artan rolunun göstəricisidir”, – deyə BMT eksperti əlavə edib.
Müxbir - Mehrac Ağasiyev
Bölmənin digər xəbərləri
