Bakı, 9 fevral, AZƏRTAC

2022-ci ildə “Azəri-Çıraq-Günəşli” (AÇG) üzrə fəaliyyətlərə təqribən 470 milyon dollar əməliyyat məsrəfləri və 1 milyard 624 milyon dollar əsaslı məsrəflər xərclənilib.

AZƏRTAC xəbər verir ki, bu barədə BP-nin illik hesabatında qeyd olunub.

İl ərzində “Azəri-Mərkəzi-Şərqi” (ACE) platformasının üst modullarının və qazma avadanlıqlarının istehsal-quraşdırma işləri Bibiheybətdəki tikinti sahəsində davam etdirilib. Həmçinin qazma modullarının üst tikililər blokuna inteqrasiyası davam edib - dəstək modulu və qazma avadanlığı dəsti istismar sınaqlarına təhvil verilib, qazma qurğusunun sürüşdürülməsi əməliyyatları üzrə istismar sınaqları başlanıb.

Bundan əvvəl 2350 tonluq modullu qazmaya dəstək modulu və çəkisi 2400 ton olan qazma avadanlığı dəsti təhlükəsiz şəkildə lazım olan hündürlüyə (təxminən 27 metr yüksəkliyə) qaldırılaraq uğurla göyərtənin üzərinə sürüşdürülüb. Bu, çox dəqiqliklə hesablanmış mürəkkəb bir “qaldırma və sürüşdürmə” əməliyyatı idi və bütün dünya üzrə BP-də ilk dəfə idi ki, icra olunurdu.

Hesabatda bildirilir ki, üst modulların mexaniki tamamlanması qrafikə uyğun başa çatıb. Ümumilikdə, üst modulların quruda istismar sınaqları 85 faiz tamamlanıb. Yaşayış modulları üzrə işlərin təhvil verilməsi başa çatıb və hazırda modullar quruda yaşayış üçün hazırdır.

Heydər Əliyev adına Bakı Dərin Özüllər Zavodunda dayaq bloku STB-01 daşıma barjasına yüklənib və artıq dənizə yola salınmağa hazırdır.

Azərbaycan kran barjası Bakı Dərin Özüllər Zavoduna gətirilib. Barjada dayaq blokunun dənizdə quraşdırılması üçün tələb olunan reaktivasiya işləri başlanıb.

Səngəçal terminalında ACE əməliyyatlarının qurudan idarə olunması üçün aparılan tikinti işləri və bununla bağlı istismar sınaqları bitib. Platformanın üst modulları ilə inteqrasiya işləri görülür.

2022-ci ilin sonuna ACE layihəsi üzrə işlər ümumilikdə 80 faiz tamamlanıb.