“Brent” neftinin qiyməti 100 dolları ötüb
Bakı, 23 iyul, AZƏRTAC
“Brent” markalı xam neftin bir barelinin qiyməti iki ay sonra ilk dəfə 100 dolları keçib.
AZƏRTAC xəbər verir ki, hazırda Londonun ICE birjasında “Brent” neftinin bir bareli 100 dollardan, Nyu-Yorkun NYMEX birjasında “Light” markalı neftin bir bareli isə 91 dollardan baha satılır.
Analitiklərin fikrincə, neft qiymətləri Yaxın Şərqdə münaqişənin kəskinləşməsi və təchizatdakı fasilələr, eləcə də Qırmızı dənizdə baş verən son proseslər fonunda artır. Yəməndə yerləşən bir qrupun hücumları ABŞ və İran arasında gərginliyin artmasından sonra Körfəzə açılan “qapı” olan Hörmüz boğazında onsuz da nəqliyyatın hərəkətini iflic edən regional münaqişədə yeni cəbhə açıb.
Qeyd edək ki, Yaxın Şərqdə münaqişənin kəskinləşməsindən sonra Qırmızı dənizin cənub ucundakı Bab əl-Məndəb boğazı neft ixracı üçün həyati əhəmiyyət kəsb edir.
Bölmənin digər xəbərləri
