Bu gün beynəlxalq aləmdə Azərbaycanın nüfuzu durmadan artmaqdadır
Bakı, 11 mart, AZƏRTAC
Prezident İlham Əliyev hər zaman dövlətin inkişafının sürətləndirilməsi üçün islahatların aparılmasının vacibliyini vurğulayır. Aparılan islahatlar ölkəmizin sosial-iqtisadi vəziyyətinə müsbət təsir etməklə yanaşı, cəmiyyətdə dövlətə, dövlətimizin başçısına inamı artırıb. 2018-ci ildən başlayaraq Prezident İlham Əliyevin tapşırığına əsasən mərkəzi və yerli icra strukturları da daxil olmaqla bütün sahələrdə köklü islahatlara start verilib.
Bu sözləri AZƏRTAC-a açıqlamasında Milli Məclisin deputatı Kamilə Əliyeva deyib.
O bildirib ki, Azərbaycan Respublikasının Milli Məclisi də ölkəmizdə aparılan islahatlardan kənarda qalmadı. V çağırış Milli Məclis özünün buraxılması və vaxtından əvvəl parlament seçkilərinin keçirilməsi haqqında qərar qəbul etdi. 2020-ci ilin fevralında VI çağırış Milli Məclisə deputat seçkiləri baş tutdu və parlamentə təcrübəli deputatlarla yanaşı, savadlı gənclərimiz də seçildi. Prezident İlham Əliyev 2020-ci il martın 10-da VI çağırış Milli Məclisin ilk iclasında ölkədə aparılan dərin islahatlar barədə ətraflı çıxış etdi.
Milli Məclisin deputatı qeyd edib ki, Azərbaycanda keçirilən parlament seçkilərini müşahidə edən bütün beynəlxalq təşkilatlar seçkilərin demokratik, tam şəffaf şəraitdə keçirildiyini qeyd etdilər. VI çağırış Milli Məclis çoxpartiyalı parlament olaraq formalaşdı. Azərbaycanda fəaliyyət göstərən bütün siyasi partiyalar seçkilərdə iştirak etdilər. Müxalifət partiyalarının nümayəndələrinin VI çağırış Milli Məclisin rəhbərliyində və komitələrin rəhbərliyində təmsil olunması sübut edir ki, Azərbaycanda demokratik dəyərlərə, eləcə də siyasi münasibətlərin sağlamlaşdırılmasına böyük əhəmiyyət verilir.
“Prezident İlham Əliyev tərəfindən ölkəmizdə kadr siyasəti həyata keçirilməyə başladı. Bəzi yerli icra orqanlarında baş vermiş rüşvətxorluq, digər xoşagəlməz hallar aşkarlandı. Onların bu əməlləri ifşa olundu və qanun qarşısına çıxarıldı. Prezident İlham Əliyev bütün çıxışlarında dəfələrlə məmurlara vicdanla işləmək, xalqa xidmət etmək tapşırığını verib.
Milli Məclisdə çıxışında Prezident deputatlar qarşısında böyük vəzifələrin durduğunu, Azərbaycan dövlətinin güclənməsi və xalqın rifahının yüksəldilməsi üçün möhkəm əsasları olan qanunların qəbul edilməsinin vacibliyini vurğuladı. Dövlətimizin başçısı aparılan kadr islahatlarında gənclərə böyük etimad göstərərək onları yüksək vəzifələrə təyin etdi. Prezident İlham Əliyev hər zaman Azərbaycanın xoşbəxt gələcəyinin gənclərdən asılı olduğunu vurğulayır. Vəzifəyə təyin olunmuş gənclərimiz də Prezidentin onlara göstərdiyi etimadı doğrultmağa çalışırlar. Azərbaycanda aparılan bu köklü islahatlar ölkəmizin güclənməsinə xidmət edən amillərdəndir”, - deyə Milli Məclisin deputatı diqqətə çatdırıb.
Onun sözlərinə görə, bu gün beynəlxalq aləmdə Azərbaycanın nüfuzu durmadan artmaqdadır. Ölkəmiz dünyada iqtisadi, siyasi cəhətdən güclü bir dövlətə çevrilib. Azərbaycanın bu inkişafını gözü götürməyən bəzi xarici qüvvələr ölkəmizdə yeni beşinci kalon yaratmaq niyyətindədir. Bu yolu tutanlar bilməlidirlər ki, Vətənə, dövlətə, xalqa qarşı xəyanət ən böyük cinayətdir. Bu gün ölkəmizdə siyasi sabitlik hökm sürür. Hər bir Azərbaycan vətəndaşı bu sabitliyi, əmin-amanlığı qorumağa borcludur. Prezident İlham Əliyev tərəfindən aparılan bütün islahatlar Azərbaycan dövlətinin milli maraqlarına xidmət edir.
Bölmənin digər xəbərləri
