Bu gün Coğrafi İnformasiya Sistemləri Günüdür
Bakı, 15 noyabr, AZƏRTAC
15 noyabr - Coğrafi İnformasiya Sistemləri (CIS) Günüdür. Bu gün dünyanın bir çox ölkəsində noyabrın üçüncü çərşənbə günü qeyd olunur.
AZƏRTAC xəbər verir ki, əsası 1999-cu ildə ABŞ-da qoyulan CİS Günü sonradan digər ölkələrdə də keçirilməyə başlanılıb. CİS bütün coğrafi məlumatları əldə etmək, saxlamaq, təhlil, idarə və manipulyasiya etmək üçün nəzərdə tutulub. Məlumatlar xəritələrin, proqramların və məkana əsaslanan xidmətlərin yaradılması və mobil cihazların olduğu yeri göstərməsini təmin edir.
CİS Günü “ESRİ” şirkətinin prezidenti və qurucusu, coğrafi informasiya sistemləri və coğrafi məlumat bazasının idarə edilməsi proqram təminatlarının beynəlxalq təchizatçısı Cek Dangermond tərəfindən təsis edilib.
Hazırda dünyada 74 ölkə CİS Gününü qeyd edir.
Qeyd edək ki, Ekologiya və Təbii Sərvətlər Nazirliyinin Geodeziya və Kartoqrafiya üzrə Dövlət Agentliyi geodeziya, topoqrafiya, xəritəçəkmə, qravimetriya və kartoqrafiya, həmçinin dövlət əhəmiyyətli coğrafi məlumat sistemlərinin yaradılması sahələrində işlərin aparılmasını təmin edən qurumdur.
Bölmənin digər xəbərləri
