Bu il 437 milyon balıq körpəsi su hövzələrinə buraxılıb
Bakı, 31 dekabr, G.Mahmudlu, AZƏRTAC
Bu il 437 milyon müxtəlif növ balıq körpələri respublikanın təbii su hövzələrinə buraxılıb. Bunların 190 mindən çoxunu qızılbalıq, 8,3 milyonunu nərəkimilər, 428 milyonunu isə çəkikimilər təşkil edib.
Bu barədə AZƏRTAC-a Ekologiya və Təbii Sərvətlər Nazirliyinin su hövzələrində bioresursların artırılması sektorunun müdiri Fəridə Ələkbərova məxsusi müsahibəsində məlumat verib.
F.Ələkbərova bildirib ki, qızılbalıqların yetişdirilərək su hövzələrinə buraxılması plandan artıq olub. Buna görə də gələn il həmin balıq növləri üçün nəzərdə tutulmuş planın artırılması gözlənilir.
Sektor müdiri bütün balıq növləri üzrə müəyyən edilmiş proqnozlara 92 faiz əməl olunduğunu qeyd edib. Ümumi balıq buraxılışında ötən illə müqayisədə təxminən 1,07 faiz artım müşahidə olunub.
Bölmənin digər xəbərləri
