BUNDESTAQIN QAFQAZ ÖLKƏLƏRİ İLƏ ƏMƏKDAŞLIQ QRUPUNUN YENİ SƏDRİ AZƏRBAYCAN SƏFİRİ İLƏ GÖRÜŞMÜŞDÜR
Almaniya bundestaqının Qafqaz ölkələri ilə əməkdaşlıq qrupunun yeni sədri Vinfrid Mante ilk görüşünü Azərbaycanın Berlindəki səfiri Hüseynağa Sadıqovla keçirmişdir. Martın 14-də isə Cənubi Qafqaz ölkələri səfirlərinin qrupunun üzvləri ilə görüşü olacaqdır.
Almaniya Xarici İşlər Nazirliyindən və Fridrix Ebert Fondundan Azərbaycan haqqında müəyyən məlumat aldığını bildirən cənab Mante demişdir ki, onun başçılıq etdiyi qrup Ermənistan-Azərbaycan münaqişəsinin həlli məsələsi ilə yaxından maraqlanır.
Səfir Hüseynağa Sadıqov ölkəmizdə aparılan islahatlar və Ermənistan-Azərbaycan münaqişəsindəki mövcud vəziyyət haqqında məlumat vermiş və təəssüflə bildirmişdir ki, qrupun keçmiş üzvləri Milli Məclisdə fəaliyyət göstərən Azərbaycan-Almaniya dostluq qrupu ilə yaxından təmasda olmamışdır. Səfir on il bundan öncə törədilmiş Xocalı soyqırımı, erməni əsirliyində saxlanılan azərbaycanlılara qarşı qeyri-insani münasibət, onların daxili orqanlarının çıxarılaraq satılması, bu vəhşilik faktlarının Amerika Konqresində və müxtəlif təşkilatlarda təsdiqləndiyi barədə də məlumat vermişdir.
Qafqaz qrupunun yeni sədri bu faktlar haqqında beynəlxalq təşkilatların müvafiq sənədlərin onlara təqdim olunmasını xahiş etmiş və bununla yaxından maraqlanacaqlarını, müvafiq beynəlxalq təşkilatlar qarşısında məsələni ciddi qaldıracaqlarını bildirmişdir. Azərbaycan ərazisinin 20 faizinin Ermənistan tərəfindən işğal olunmasını, bir milyondan artıq azərbaycanlının qaçqın-köçkün vəziyyətində ağır şəraitdə yaşamasını fakt kimi qəbul etdiyini vurğulayan deputat dünya ictimaiyyətinin bu hadisələrə, xüsusilə Xocalıda törədilən qanlı cinayətlərə indiyədək biganə qalmasından təəccübləndiyini söyləmiş, “işğal zonası” adlandırdığı ərazilərimizdəki mövcud vəziyyətlə maraqlanmışdır.
Ona məlumat verilmişdir ki, Azərbaycanın Qarabağ bölgəsindən və onun ətrafındakı 7 rayondan bütün azərbaycanlılar didərgin salınmış, bir qismi məhv edilmiş, əsir götürülmüşlər. İşğal olunmuş ərazilərdə narkotik maddələrin qanunsuz dövriyyəsi, silah alveri, terrorizm fəaliyyəti üçün münbit zəmin vardır.
Avropa Birliyinin şərqə doğru genişlənməsinin Azərbaycan üçün də əhəmiyyətli olduğunu söyləyən cənab Mante regiondakı iqtisadi vəziyyətlə də maraqlanmış, eyni zamanda demişdir ki, Ermənistan və Gürcüstanda iqtisadi durumun ağır, Azərbaycanda isə nisbətən yaxşı olması, onun böyük iqtisadi potensialı barədə məlumatı vardır.
Yusif Xəlilov
AZƏRTAC-ın xüsusi müxbiri
BERLİN
Bölmənin digər xəbərləri
