Cari ildə ölkəmizin turizm potensialı elektron marketinq vasitələri ilə təbliğ olunmuşdur
Bakı, 25 dekabr, AZƏRTAC
Son vaxtlar elektron vasitələrin mühüm və effektiv marketinq kanalına çevrilməsi turizm sahəsində elektron marketinqin daha geniş istifadə edilməsi üçün zəmin yaradıb. Tədqiqatlar göstərir ki, inkişaf etmiş Avropa, Asiya və Amerika ölkələrində elektron marketinq üsulları daha geniş istifadə olunur və ənənəvi marketinq üsullarından daha böyük marketinq potensialına malikdir. Bunları nəzərə alaraq, elektron vasitələr ilə Azərbaycanın turizm potensialının xarici ölkələrdə təbliğ olunması təbliğat siyasətimizin prioritetlərindən biri hesab olunur.
Mədəniyyət və Turizm Nazirliyi tərəfindən yaradılmış www.azerbaijan.travel rəsmi milli turizm portalı son illər ərzində daxili və xarici turistlər üçün Azərbaycanın turizm potensialı, o cümlədən təbiəti, turizm infrastrukturu, ictimai nəqliyyat sistemi, ölkəmizin unikal turizm məhsulları (unique selling points), turizm şirkətləri və mehmanxanaları barədə geniş məlumat bazası və ölkəmizin təbliğat vasitəsi rolunu oynayıb. www.azerbaijan.travel internet saytı 2013-cü ildə Azərbaycan, ingilis, rus və çin dillərində yaradılıb.
Nazirliyin mətbuat xidmətindən AZƏRTAC-a bildirilib ki, 2014-cü il ərzində saytın türk, fransız və alman versiyaları təhvil verilib. Beləliklə ölkəmizin rəsmi turizm internet portalı artıq 7 dildə fəaliyyət göstərir. Qeyd etmək lazımdır ki, cari il ərzində sayta Azərbaycan, Rusiya, Böyük Britaniya, Ukrayna, ABŞ və digər ölkələrdən təxminən 600 min nəfər istifadəçi daxil olub.
Qeyd olunan dövr ərzində nazirliyin turizm üzrə facebook səhifəsində ölkəmizin turizm potensialı haqqında məlumat və xəbərlər, habelə müvafiq şəkillər yerləşdirilib. Hazırda nazirliyin turizm üzrə facebook səhifəsi izləyicilərin sayına görə (like-lar üzrə) dövlət qurumları tərəfindən yaradılmış müvafiq səhifələr sırasında 4-cü yerdədir.
Bununla yanaşı gəlmə turizmi üzrə prioritet sayılan ölkələrdə turizm potensialımızın təbliğ edilməsi məqsədilə alman və rus saytlarında müvafiq elektron banerlər yerləşdirilib, onlayn müsabiqələr keçirilib.
Cari il ərzində Azərbaycanın regionlarının turizm potensialı bloqqerlər tərəfindən təbliğ olunub. Belə ki, Mədəniyyət və Turizm Nazirliyinin dəstəyi ilə Azərbaycanın regionlarının təbliği ilə bağlı layihə həyata keçirilib. Layihəyə uyğun olaraq, Azərbaycanın Quba, Qusar, İsmayıllı, Masallı, Xaçmaz, Şəki, Mingəçevir, Gəncə, Şəmkir və Şamaxı kimi bir sıra regionları haqqında rus dilində məqalələr hazırlanıb. Regionlar haqqında qeydlər, məqalələr və şəkillər Facebook, Twitter, Mail.ru və VK sosial şəbəkələrində, həmçinin, news.day.az xəbər portalında yayımlanıb. Ümumilikdə layihə çərçivəsində 13 məqalə yazılıb, 458 şəkil yayımlanıb. Bugünə qədər toplam baxışların sayı 52 687 olub.
Həmçinin Mədəniyyət və Turizm Nazirliyi tərəfindən “Azərbaycanda 20 gün” layihəsi həyata keçirilib. Layihəyə uyğun olaraq, ölkəmizdə tanınmış bloqqer Azərbaycanın Quba, Qusar, Şamaxı, İsmayıllı, Qəbələ, Şəki, Zaqatala, Mingəçevir, Naftalan, Göygöl, Gəncə, Şəmkir, Qazax, Lənkəran, Lerik, Masallı və Qobustan kimi bir sıra regionlarına səyahət edib və bu səyahətlər üzrə hər regiona dair Azərbaycan və rus dillərində məqalə hazırlanıb, həmçinin, çox sayda şəkillər çəkilib. Regionlar haqqında qeydlər, məqalələr və şəkillər bloqqerin şəxsi elektron səhifəsində, Facebook, Twitter, G+ və Instagram sosial şəbəkələrində, həmçinin, 1news.az, lent.az xəbər portallarında yayımlanıb. Ümumilikdə 12 məqalə yazılıb, 341 şəkil və 1 video-çarx yayımlanıb. Bugünə qədər toplam baxışların sayı 68 777 olub.
Eyni zamanda Mədəniyyət və Turizm Nazirliyinin əməkdaşlıq etdiyi “Euronews”, “CNN”, “TV5Monde” və digər telekanalların rəsmi saytlarında Azərbaycanın turizm potensialının təbliği məqsədilə müvafiq banerlər yerləşdirilib.
Bölmənin digər xəbərləri
