“Caspian Energy Club” növbəti “Online Round Table” təşkil edib
Bakı, 18 mart, AZƏRTAC
Azərbaycan Avtomobil Yolları Dövlət Agentliyinin Avtomobil Yollarının İstismarı və Təmiri Baş İdarəsinin rəis müavini Hidayət Rüstəmov “Caspian Energy Club”un təşkil etdiyi ənənəvi “Online Round Table”da iştirak edib.
Bu barədə AZƏRTAC-a “Caspian Energy Club”un sədri və baş icraçı direktoru Telman Əliyev məlumat verib.
Tədbir Azərbaycanın ərazi bütövlüyü uğrunda şəhid olanların xatirəsinin bir dəqiqəlik sükutla yad edilməsi ilə başlayıb.
H.Rüstəmov tədbir iştirakçılarını Azərbaycanın Vətən müharibəsindəki şanlı Qələbəsi münasibətilə təbrik edib. O, Avtomobil Yolları Dövlət Agentliyi haqqında məlumat verərək agentliyin ölkə ərazisində avtomobil yollarının layihələndirmə, tikinti və qorunması ilə məşğul olduğunu qeyd edib. H.Rüstəmov ölkə ərazisi ilə yanaşı, Bakı şəhərinin aparıcı yollarının təmir-tikinti işlərinin də agentliyə həvalə edildiyini vurğulayıb.
“Son illərdə kənd yaşayış məntəqələrindəki yolların tikinti və yenidən qurulmasına Avtomobil Yolları Dövlət Agentliyi tərəfindən diqqət artırılıb, Hər il 600-800 kilometr uzunluğunda kənd yolları yenidən qurulur. Bu, birbaşa kənd təsərrüfatının inkişafına və məhsulların iri bazarlara tez zamanda çatdırılmasına kömək edir. Onu da qeyd edim ki, ərazilərin işğaldan azad edilməsindən sonra respublika paytaxtını ölkə sərhədləri ilə birləşdirən magistral yollar artıq Ermənistan sərhədinə kimi uzadılacaq”, - deyə agentlik rəsmisi diqqətə çatdırıb.
Daha sonra H.Rüstəmov “Online Round Table” iştirakçılarının təkliflərini dinləyib, suallarını cavablandırıb.
"Caspian Energy Club"un sədri və baş icraçı direktoru T.Əliyev təklif edib ki, Azərbaycan Avtomobil Yolları Dövlət Agentliyi və Caspian Energy Club arasında birgə ikitərəfli işçi qrupu yaradılsın.
Qeyd edək ki, ikitərəfli işçi qrupu mütəmadi olaraq aktual sual, təklif və problemləri müzakirə etməyə və operativ cavablandırmağa imkan verir.
Xatırladaq ki, sıralarında 50 ölkədən 5000-dən çox şirkət və təşkilatı birləşdirən “Caspian Energy Club” 2002-ci ilin iyununda yaradılıb. “Biznes-hökumət” dialoqunun fəal iştirakçısı olan “Caspian Energy Club”un əsas məqsədi Azərbaycanda və “Caspian Energy Club”un fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqların stimullaşdırılmasından və onlarda fəal iştirak etməkdən ibarətdir.
Biznes-netvorkinq üçün beynəlxalq platforma olan “Caspian Energy Club” mütəmadi olaraq müxtəlif tədbirlər təşkil edir. Mənzil-qərargahı Bakıda yerləşən “Caspian Energy Club”un Gürcüstan və Qazaxıstanda rəsmi nümayəndəlikləri, həmçinin dünyanın müxtəlif ölkələrində səlahiyyətli nümayəndələri var.
Tədbir çərçivəsində aktual sual və təkliflər müzakirə olunub.
Bölmənin digər xəbərləri
