Cavid Osmanov: Region ölkələri Azərbaycanla əlaqələrin yüksək səviyyəyə çatdırılmasında maraqlıdırlar
Bakı, 28 oktyabr, AZƏRTAC
Prezident İlham Əliyevin həyata keçirdiyi düşünülmüş uğurlu xarici siyasət ölkəmizin beynəlxalq əlaqələrinin davamlı inkişafını birmənalı olaraq təmin edir. Bu gün Azərbaycan güclü dövlətdir və beynəlxalq aləmdə yüksək nüfuz sahibidir. Məhz bu baxımdan istər region ölkələri, istərsə də dünyanın digər ölkələri Azərbaycanla əlaqələrin qurulmasında, həmçinin mövcud əlaqələrin yüksək səviyyəyə çatdırılmasında maraqlıdırlar. Qonşu ölkə olan Gürcüstanla da yüksək səviyyədə olan əlaqələrimiz bunun bariz nümunəsidir.
Bunu AZƏRTAC-a açıqlamasında Milli Məclisin deputatı Cavid Osmanov bildirib.
Ölkələrimiz arasında yüksək səviyyəli əməkdaşlığın mövcud olduğunu diqqətə çatdıran deputat Prezident İlham Əliyevin oktyabrın 24-də Gürcüstana işgüzar səfəri iki ölkə arasındakı dostluq və qardaşlıq münasibətlərinə yeni təkan verəcəyini vurğulayıb.
“Azərbaycan və Gürcüstan münasibətləri çox dərin ənənələr üzərində qurulub. Tarixə nəzər yetirdikdə də görürük ki, xalqlarımız əsrlər boyu dostluq, qardaşlıq, mehriban qonşuluq şəraitində yaşamışlar. Əminliklə demək mümkündür ki, iki ölkə arasındakı əməkdaşlıq tarixi ənənələrə söykənir və dövlətlərarası əlaqələr də bu möhkəm təməl üzərində qurulub.
Gürcüstana işgüzar səfəri zamanı mətbuata verdiyi bəyanatında Prezident İlham Əliyev ölkələrimiz arasındakı yüksək səviyyəli əlaqələrdən bəhs edərkən bildirdi ki, bu gün strateji tərəfdaşlıq əlaqələrimiz müttəfiqlik səviyyəsinə yüksəlib. Eyni zamanda, ölkələrimiz həm ikitərəfli formatda, həm də beynəlxalq təşkilatlar çərçivəsində daim bir-birini dəstəkləyir. Azərbaycan və Gürcüstanın birgə həyata keçirdikləri layihələr təkcə ölkələrimiz üçün deyil, bölgə üçün, bütövlükdə Avropa üçün xüsusi əhəmiyyət daşıyır. Bir sözlə desək, ölkələrimizin əməkdaşlığı regional əhəmiyyətə malikdir”, - deyə C.Osmanov qeyd edib.
Ölkəmizin regionda sülh, təhlükəsizlik və əməkdaşlıqda maraqlı olan ölkə olduğunu vurğulayan deputat bildirib ki, bunu Gürcüstanla olan münasibətlər də təsdiq edir. Ölkələrimiz arasında ticarət dövriyyəsi artmaqda davam edir. Belə ki, cari ilin 9 ayında qarşılıqlı ticarət dövriyyəsi bir milyard ABŞ dollarına yaxınlaşıb. Ölkəmizin sərmayəsi ilə həyata keçirilən layihələr Azərbaycan-Gürcüstan əməkdaşlığını daha da gücləndirir. Ölkəmiz Gürcüstana 3 milyard dollardan çox sərmayə yatırıb. Təbii ki, bu sərmayə qarşılıqlı faydalı sərmayədir və hər iki ölkənin maraqlarına cavab verir. “Dövlətimizin başçısı Azərbaycanın dünya bazarlarına qaz ixracatını artırmaq niyyətində olduğunu, bu il ölkəmizin ixracının 22 milyard kubmetrə çatacağını, gələn il isə daha da artacağını qeyd etdi. Avropa Komissiyası ilə Azərbaycan arasında imzalanmış enerji sahəsində strateji tərəfdaşlığa dair Memorandumda da göstərilir ki, növbəti 5 ildə Azərbaycan Avropaya qaz ixracını iki dəfə artıracaq. Beləliklə, 2027-ci ildə Azərbaycan təkcə Avropaya qaz ixracatını 20 milyard kubmetrə çatdırmağı planlaşdırır. Həmçinin gələn il Bakı-Tbilisi-Ceyhan neft kəməri ilə də ixrac artırılacaq. Bütün bunlardan əlavə olaraq, həyata keçiriləcək yeni layihə elektrik enerjisi ilə bağlı olacaq. Ölkəmiz çalışır ki, öz elektrik enerjisini dünya bazarlarına ixrac etsin. Azərbaycanın ixrac istiqaməti Gürcüstandan keçir. Ölkəmizin yüksək bərpaolunan enerji potensialına malik olduğunu vurğulayaraq qeyd etdi ki, təkcə azad edilmiş torpaqlarda 10 giqavatt gücündə bərpaolunan enerji növlərindən istifadə etmək olar. Xəzər dənizində isə bu rəqəm 157 giqavatta çatır. Bu enerjini istehsal və ixrac etmək Azərbaycanın növbəti illərdəki hədəflərindəndir. Ölkəmiz Gürcüstanla digər sahələrdə olduğu kimi, bu sahədə də fəal əməkdaşlıq edəcəkdir”, - deyə deputat bildirib.
Gürcüstanla Azərbaycan arasında isə bu mövzuda heç bir fikir ayrılığı olmadığını deyən Cavid Osmanov vurğulayıb: “Hazırda Avropada və dünyada enerji resurslarına bütövlükdə böyük tələbat vardır, məhz ölkələrimiz də bu kimi məsələlərdə bir mövqedən çıxış edərək öz milli maraqlarını təmin edəcəklər”.
Bölmənin digər xəbərləri
