Cenevrədə iqlim dəyişmələrinə dair qlobal sazişin rəsmi layihəsi razılaşdırılıb
Bakı, 14 fevral, AZƏRTAC
Cenevrədə iqlim dəyişmələrinə dair yeddi gün davam etmiş danışıqlar qlobal sazişin vahid layihəsinin hazırlanması ilə başa çatıb. Bu layihə sonrakı danışıqlar üçün əsas olacaq.
AZƏRTAC BMT-nin Xəbərlər Mərkəzinə istinadla bildirir ki, iqlim dəyişmələrinə dair yeni qlobal saziş bu il dekabr ayında Parisdə bəyənilməli və 2020-ci ilə qədər qanuni qüvvəyə minməlidir.
BMT-nin iqlim dəyişmələrinə dair Çərçivə Konvensiyasının Katibliyinin rəhbəri Kristiana Fiqeyros Cenevrə danışıqlarının iştirakçılarının məsələyə konstruktiv yanaşmasını və operativ işini alqışlayıb.
Danışıqlarda saziş layihəsinin istiləşmənin nəticələrinin yumşaldılması, uyğunlaşma, maliyyələşdirmə və texnologiya mübadiləsi ilə bağlı müddəaları müzakirə edilib.
Kristiana Fiqeyros deyib: “Biz bu sessiyada qarşımızda duran məqsədə nail olduq - saziş layihəsinin qeyri-rəsmi qaralama variantından rəsmi mətnə keçid oldu. Bu mətn Paris görüşünə qədər aparılacaq danışıqlar üçün əsas olacaq”.
Danışıqların növbəti raundu iyun ayında Bonnda keçiriləcək.
Bölmənin digər xəbərləri
