Cənubi Afrika Respublikası qəzetində Xocalı faciəsinə dair məqalə dərc olunub
Bakı, 21 fevral, AZƏRTAC
Cənubi Afrika Respublikasının (CAR) “Mail and Guardians” qəzetində Xocalı soyqırımına həsr olunan “Xocalı soyqırımı 20-ci əsrin dəhşətli cinayətidir, Azərbaycan xalqı bunu heç vaxt unutmayıb və unutmayacaq” adlı məqalə dərc edilib.
Ölkəmizin CAR-dakı səfirliyindən AZƏRTAC-a bildiriblər ki, məqalədə hər il fevralın sonunda Azərbaycan xalqının Xocalı şəhərində baş vermiş faciə qurbanlarının xatirəsini yad etdiyi vurğulanıb. Xatırlanıb ki, 1992-ci il fevralın 25-dən 26-na keçən Ermənistan silahlı qüvvələri keçmiş SSRİ-nin əksəriyyəti ermənilərdən ibarət 366-cı motoatıcı alayının köməyi ilə Xocalı şəhərini işğal edib. Bu gün Qarabağın kiçik bir şəhərində yüzlərlə silahsız mülki şəxsin vəhşicəsinə öldürülməsindən 33 il ötür. Fevralın 26-sı Azərbaycan xalqına qarşı yersiz qəddarlığın anım rəmzinə çevrilib. 2020-ci ildə İkinci Qarabağ müharibəsindən sonra 2023-cü ildə ərazi bütövlüyünün, eləcə də suverenliyinin tam bərpası Azərbaycanın torpaqlarının işğaldan azad edilməsi istiqamətində 30 illik səylərinin yekun zirvəsi oldu. Bu, həm də Azərbaycan xalqına qarşı törədilmiş bütün cinayətlərin, soyqırımların qisası idi.
Yazıda, həmçinin bildirilir: “Azərbaycan xalqına qarşı keçmişdə törədilmiş soyqırımı heç vaxt diqqətdən kənarda qalmamalıdır. Azərbaycan xalqı bu faciə haqqında həqiqətləri gənc, vətənpərvər nəslə çatdırılması, eyni zamanda, milli ədəbiyyatımıza, folklorumuza, bütövlükdə mədəniyyətimizə daxil edilməsi istiqamətində səylərini əsirgəmir.
Təəssüf ki, 20-ci əsrin sonuna yaxın bəşəriyyətə, sülhə - Azərbaycana qarşı cinayətlər davam etdi və bu, ölkənin keçmişində silinməz izlər buraxdı. 33 il öncə - 1992-ci ilin fevralın 26-da 106 qadın, 63 uşaq, 70 qoca daxil olmaqla ümumilikdə 613 nəfər qətlə yetirilmiş, 1275 vətəndaşımız əsir götürülmüş, 150 nəfərin isə yeri hələ də məlum deyil.
Ümummilli Lider Heydər Əliyev Xocalı faciəsinin Azərbaycan xalqının “qan yaddaşı” olduğunu bəyan etmiş, habelə baş verən hadisələrə siyasi qiymət verərək məsələnin beynəlxalq ictimaiyyətin diqqətinə çatdırmışdı.
Bu gün Xocalı faciəsi ilə bağlı faktların dünya ictimaiyyətinə çatdırılması, bu soyqırımına qərəzsiz qiymət verilməsi üçün daim səylər göstərilir. Heydər Əliyev Fondunun vitse-prezidenti Leyla Əliyevanın 2008-ci ildən başlatdığı “Xocalıya ədalət” kampaniyası çərçivəsində beynəlxalq ictimaiyyət faciə ilə bağlı geniş məlumata yiyələnib.
Yazıda vurğulanıb ki, 2024-cü ilin fevralında - 32 illik işğaldan sonra Azərbaycan Prezidenti İlham Əliyev Xocalı şəhərində Xocalı Soyqırımı Memorialının təməl daşını qoyub.
Bildirilib ki, 33 il bundan əvvəl öz ata-baba yurdundan qovulan xocalılıların hazırda doğma yurda qayıtmaları böyük sevinc doğurur.
Oxucuların diqqətinə çatdırılıb ki, 1992-ci il fevralın 26-da törədilmiş Xocalı soyqırımı Azərbaycan tarixində faciəli hadisə olaraq qalır. Bu gün qalib xalqın yeganə məqsədi Xocalı qətliamının beynəlxalq aləmdə tanınması və cinayətə görə məsuliyyət daşıyanların cəzalandırılmasıdır. Xocalı soyqırımı qəsdən törədilmiş etnik təmizləmə aktı kimi Azərbaycan hökuməti tərəfindən rəsmən tanınıb və 26 fevral bütün azərbaycanlılar tərəfindən anım günü kimi qeyd edilir.
Bölmənin digər xəbərləri
