Cəzaçəkmə müəssisələrinə narkotik və psixotrop maddələrin keçirilməsinin qarşısı alınıb
Bakı, 18 mart, AZƏRTAC
Penitensiar Xidmətin əməliyyat aparatının həyata keçirdiyi əməliyyat-axtarış tədbirləri nəticəsində Bakı İstintaq Təcridxanasına və 11 saylı cəzaçəkmə müəssisəsinə narkotik və psixotrop maddələrin keçirilməsi cəhdlərinin qarşısı alınıb.
Xidmətin ictimaiyyətlə əlaqələr şöbəsindən AZƏRTAC-a bildiriblər ki, Cinayət Məcəlləsinin 234.1-ci və 234.2-ci maddələrinə əsasən təqsirli bilinərək həbs edilmiş və hazırda Bakı İstintaq Təcridxanasında saxlanılan Məmmədov Ramiz Yunis oğluna qohumu Astara şəhər sakini İbrahimov İlqar Səfər oğlu tərəfindən gətirilmiş sovqata baxış keçirilib. Baxış zamanı şirniyyat qutusunun içərisində gizlədilmiş dörd sellofan bükülüdə ümumi çəkisi 2,993 qram olan heroin və 2,456 qram tiryək aşkarlanıb.
Cinayət Məcəlləsinin 185.2.2-ci maddəsinə əsasən təqsirli bilinərək üç il müddətinə azadlıqdan məhrum edilmiş və hazırda 11 saylı cəzaçəkmə müəssisəsində saxlanılan məhkum Xəlilov Samir Əlibala oğluna tanışı Bakı şəhər sakini Savalanlı Ayxan Rövşən oğlu tərəfindən gətirilmiş sovqata baxış zamanı isə şor məhsulunun içərisində xüsusi üsulla gizlədilmiş sellofan bükülüdə 0,912 qram metamfetamin aşkarlanıb.
Hər iki faktla bağlı araşdırma aparılır.
Bölmənin digər xəbərləri
