Çernobıl əlilindən xəbərdarlıq: Metsamor fəlakəti qapıdadır
Bakı, 23 aprel, AZƏRTAC
Çernobıl faciəsi bütün bəşəriyyətə bir daha sübut etdi ki, istismar müddəti başa çatmış atom elektrik stansiyalarının fəaliyyəti dayandırılmalıdır. “Çernobıl Əlilləri İttifaqı” İctimai Birliyi olaraq biz dəfələrlə beynəlxalq təşkilatlara müraciət edərək Ermənistanda yerləşən Metsamor Atom Elektrik Stansiyasının (AES) istismar müddətinin bitdiyini və region dövlətləri üçün ciddi təhlükə mənbəyinə çevrildiyini bildirmişik.
Bu barədə AZƏRTAC-a müsahibəsində ikinci qrup Çernobıl əlili Namiq Məmmədov danışıb. Onun sözlərinə görə, Metsamor AES-in seysmik zonada yerləşməsi nəzərə alınarsa, orada baş verə biləcək istənilən qəzanın fəlakət miqyası Çernobıl faciəsindən geri qalmayacaq: “O dövrdə texnologiya bu qədər inkişaf etməmişdi. Faciənin nəticələrinin aradan qaldırılması zamanı mütləq canlı qüvvədən istifadə olunurdu. Demokratiya prinsiplərinə əməl edilmir, obyektiv məlumatlar gizlədilirdi. Hərəkət azadlığı məhdudlaşdırılmışdı. İnsanların orada fəaliyyəti tibbi cəhətdən yolverilməz şəkildə istismar olunurdu”.
Namiq Məmmədov, həmçinin qeyd edib ki, həmin hadisənin təsirlərini bu gün də hiss edirlər: “Faciənin nəticələrinin aradan qaldırılmasında iştirak etdikdən sonra həyatımızda ciddi dəyişikliklər baş verdi. Ağrılar, xüsusilə də sinir sistemi problemləri ilə üzləşdik. Ən ağrılı məqam isə budur ki, Çernobıldan sonra dünyaya gələn övladlarımız da eyni problemlərlə qarşılaşırlar. Təəssüf ki, ölkəmizdə bu cür yüzlərlə əlil uşaq yaşayır”.
O əlavə edib ki, Ulu Öndər Heydər Əliyevin hakimiyyətə qayıdışından sonra Çernobıl qəzasının nəticələrinə məruz qalan insanların sosial müdafiəsi istiqamətində mühüm addımlar atılıb və bu tədbirlər bu gün də davam etdirilir: “Aparılan islahatlar nəticəsində biz çernobılçılar bir çox həyati məsələlərin həllinə nail olmuşuq”.
Bölmənin digər xəbərləri
