Çexiyada sabiq kommunist funksionerlərin pensiyaları azaldılır
Praqa, 24 iyun, AZƏRTAC
2026-cı ilin noyabrından sosializm dövrünün bir sıra funksionerlərinin yaşa görə pensiyası azaldılacaq.
AZƏRTAC xəbər verir ki, Çexoslovakiya və Slovakiya Kommunist Partiyasının yüksəkvəzifəli məmurlarının, partiya aparatlarının rəhbərlərinin, milli və dövlət təhlükəsizlik strukturlarının başçılarının, sərhədçilərin və xalq milislərinin hər bir xidmət ili üçün pensiya ödənişləri 300 kron (10 avro) azaldılır.
Təşəbbüskarlar belə bir addımın əsas məqsədinin “ölkənin totalitar keçmişi ilə bağlı məsələlərin nizama salınması” olduğunu deyirlər.
Bu gün Prezident Petr Pavel pensiyalara müvafiq düzəlişləri ehtiva edən sənədi imzalayıb. Bu, azalmadan təsirlənəcək insanların dairəsinin genişləndirilməsini nəzərdə tutur.
Keçən ilin martından indiyədək Çexoslovakiya Sosialist Respublikası dövründən 177 yüksəkvəzifəli funksionerin pensiyası ayda orta hesabla 1473 kron azaldılıb.
Siyahıya əlavələr təklifi Əmək Nazirliyi tərəfindən Totalitar Rejimlərin Öyrənilməsi İnstitutu (USTR) ilə birlikdə hazırlanıb. Yeni pensiya düzəlişləri bir neçə min insana təsir edə bilər. Daha əvvəl Çexiyanın əmək və sosial məsələlər naziri Marian Yureçka bəyan etmişdi ki, keçmiş kommunist məmurlar üçün pensiyaların kəsilməsinin üçüncü dalğası gözlənilmir.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
