Çili Diplomatik Akademiyasında Cümhuriyyətimizin 100 illik yubileyinə həsr edilən konfrans keçirilib
Bakı, 25 may, AZƏRTAC
Azərbaycan Respublikasının Çilidəki diplomatik missiyasının və Çili Xarici İşlər Nazirliyinin nəzdində fəaliyyət göstərən Çili Diplomatik Akademiyasının birgə təşkilatçılığı ilə akademiyada “Azərbaycanın regiondakı rolu: Çili ilə əlaqələrin gələcək inkişaf perspektivləri” adlı konfrans keçirilib.
Xarici İşlər Nazirliyinin mətbuat xidmətindən AZƏRTAC-a bildirilib ki, konfransda akademiyanın, eləcə də Çilinin digər universitetlərinin müəllim və tələbələri, bu ölkədə akkreditə olunmuş diplomatik korpusun üzvləri, tanınmış ictimaiyyət nümayəndələri iştirak ediblər.
Akademiyanın rektoru Antonio Kabedo ölkəmiz haqqında məlumat verərək bu il Azərbaycan Xalq Cümhuriyyətinin 100 illik yubileyinin qeyd olunduğunu, bu səbəbdən Azərbaycanla bağlı konfransın keçirilməsinin əlamətdar olduğunu bildirib.
Tədbirdə səfir Rəşad Aslanov təqdimatla çıxış edib. Azərbaycan Xalq Cümhuriyyətinin həyata keçirdiyi daxili və xarici siyasət, dövlət quruculuğu barədə məlumat verən səfir AXC-nin mövcud olduğu 23 ay ərzində gördüyü mühüm işlərdən danışıb.
Səfir Azərbaycan xalqının müstəqilliyin bərpası uğrunda apardığı azadlıq mübarizəsi, müstəqilliyin bərpasından sonra ölkəmizin üzləşdiyi problemlər barədə məlumat verib. Qeyd olunub ki, 1993-cü ildən ulu öndər Heydər Əliyevin liderliyi ilə həyata keçirilməyə başlayan balanslaşdırılmış və praqmatik xarici siyasət kursunun nəticəsində Azərbaycanın beynəlxalq əlaqələri genişlənib, ölkəmiz qlobal iqtisadi məkana inteqrasiya olunub, beynəlxalq mövqeləri möhkəmlənib. 2003-cü ildən Prezident İlham Əliyevin rəhbərliyi ilə həyata keçirilən uğurlu xarici və daxili siyasətin nəticələri haqqında məlumat verilərək bildirilib ki, Azərbaycanın gənc müstəqil ölkə olaraq 2011-ci ildə BMT-nin Təhlükəsizlik Şurasına üzv seçilməsi böyük diplomatik nailiyyət idi.
Səfir Ermənistan-Azərbaycan, Dağlıq Qarabağ münaqişəsi barədə məlumat verərək bildirib ki, münaqişə nəticəsində Azərbaycan ərazisinin 20 faizi işğal olunub, 1 milyondan artıq azərbaycanlı öz doğma yurdlarından zorla deportasiya edilərək qaçqın və məcburi köçkünə çevrilib. Ermənistan beynəlxalq təşkilatların, o cümlədən BMT Təhlükəsizlik Şurasının işğal olunmuş əraziləri Azərbaycana qaytarması barədə qətnamələrinə əhəmiyyət verməyərək hələ də işğal vəziyyətini saxlamağa və danışıqlarda qeyri-konstruktiv mövqe nümayiş etdirməyə davam edir.
Daha sonra Azərbaycanın təşəbbüsü və iştirakı ilə həyata keçirilən regional, qlobal əhəmiyyətli enerji və nəqliyyat-kommunikasiya layihələri barədə məlumat verilib. Qeyd olunub ki, reallaşdırılmaqda olan TANAP və TAP layihələri Avropanın enerji təhlükəsizliyi üçün vacib əhəmiyyət kəsb edir. Bakı-Tbilisi-Qars dəmir yolu xəttinin perspektivlərindən danışan səfir dəmir yolu xəttinin Latın Amerikası ölkələri üçün də əlverişli olduğunu qeyd edib.
Diplomat, eyni zamanda, Azərbaycanın Latın Amerikası ölkələri ilə dostluq münasibətlərindən bəhs edib, Çili ilə Azərbaycan arasında 1994-cü ildə yaradılan diplomatik münasibətlərin uğurla inkişaf etdiyini qeyd edib və bu əlaqələrin inkişaf perspektivlərindən danışıb.
Sonda R.Aslanov auditoriyanın suallarını cavablandırıb.
Bölmənin digər xəbərləri
