Çin Cənubi Asiya ölkələri ilə təqribən 1,2 milyard dollarlıq 163 müqavilə imzalayıb
Bakı, 24 iyun, AZƏRTAC
Çinin Yunnan əyalətinin Kunmin şəhərində keçirilən 9-cu “Çin-Cənubi Asiya” sərgisində indiyədək 8,66 milyard yuan (təxminən 1,21 milyard ABŞ dolları) dəyərində sövdələşmələr imzalanıb. AZƏRTAC Sinxua agentliyinə istinadla xəbər verir ki, bu barədə tədbir çərçivəsində keçirilən mətbuat konfransında məlumat verilib.
Yunnan əyaləti Ticarət departamentinin məlumatına görə, tərəflər arasında ümumilikdə 163 müqavilə imzalanıb. Onların arasında 8,3 milyard yuan dəyərində 150 müqavilə, 213 milyon yuan dəyərində 12 anlaşma memorandumu və 150 milyon yuan dəyərində bir satınalma çərçivə sazişi var.
Sövdələşmələr kənd təsərrüfatı, kimya və ərzaq məhsulları, mineral ehtiyatlar, maşın və avadanlıqlar, həmçinin yüngül sənaye mallarını əhatə edir.
Sərgidə təchizat zənciri xidmətləri, beynəlxalq logistika, xaricdə anbar tikintisi, liman infrastrukturu və smart xidmətlər üzrə 20-dən çox əməkdaşlıq sazişi imzalanıb.
İyunun 19-dan 24-dək davam edən 9-cu Çin-Cənubi Asiya sərgisi 73 ölkə, region və beynəlxalq təşkilatlardan iştirakçılar cəlb edib. Sərgidə Cənubi və Cənub-Şərqi Asiyanın bütün ölkələrini tam əhatə edən 2500-dən çox müəssisə təmsil olunur.
Bölmənin digər xəbərləri
