Çində dağıntı altından 132 saat sonra bir nəfər xilas edilib VİDEO
Pekin, 5 may, AZƏRTAC
Çinin Çanşa şəhərində çökən binanın dağıntıları altından 132 saat sonra bir nəfər də xilas edilib.
AZƏRTAC şəhər hökumətinin məlumatına istinadla xəbər verir ki, axtarış əməliyyatının gedişində yeri müəyyən edilən qadın 3 saatdan sonra xilas edilərək, xəstəxanaya yerləşdirilib. O, dağıntı altından xilas edilən 10-cu adamdır.
Hazırda axtarış işləri davam edir. Dağıntı altında sağ qalanların olması ehtimalı əsas götürülərək, axtarış işlərində ağır texnikadan istifadə olunmur.
Qeyd edək ki, aprelin 29-da günorta saatlarında Çanşa şəhərində səkkizmərtəbəli bina çöküb. Müvafiq icazə olmadan inşa edilmiş binada qəza nəticəsində 39 nəfərin itkin düşdüyü güman olunur. İndiyədək dağıntılar altından 5 nəfərin meyiti tapılıb. Hələlik qəzanın dəqiq səbəbləri bilinməsə də, icarədarların binanın strukturunda apardığı müəyyən dəyişikliklərin qəzaya səbəb olduğu güman edilir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
