Çinin “World Affairs Pictorial” jurnalında Azərbaycandan bəhs olunub
Pekin, 10 oktyabr, AZƏRTAC
Çinin “World Affairs Pictorial” jurnalının növbəti nömrəsində oxuculara Azərbaycanın tarixindən, mədəniyyətindən, iqtisadi inkişafından bəhs edən geniş məqalə dərc olunub.
AZƏRTAC xəbər verir ki, ölkəmizin Çindəki səfiri Əkrəm Zeynallının müsahibəsi əsasında hazırlanan məqalədə Azərbaycanın Avropa və Asiya arasında mühüm nəqliyyat-logistika dəhlizi olduğu vurğulanıb, bu xüsusda Çinin “Kəmər və yol” təşəbbüsünün Azərbaycan ilə Çin arasında əməkdaşlıq üçün yaratdığı imkanlardan söz açılıb. Bildirilib ki, “Kəmər və yol” təşəbbüsünü ilk dəstəkləyən ölkələrdən olan Azərbaycan əlverişli coğrafi mövqeyi, sahib olduğu nəqliyyat potensialı ilə yüklərin Asiyadan, o cümlədən Çindən Avropaya və əks istiqamətdə daşınmasına mühüm töhfələr verir. Azərbaycan Prezidenti İlham Əliyevin Çin Xalq Respublikasının Sədri Si Cinpinin dəvəti ilə 2019-cu ildə 2-ci “Kəmər və yol” beynəlxalq əməkdaşlıq forumunda iştirakı hər iki tərəfin bu istiqamətdə əməkdaşlığa əhəmiyyət verdiyini göstərir.
Məqalədə bu il Azərbaycan ilə Çin arasında diplomatik əlaqələrin qurulmasının 30-cu ildönümü olduğu vurğulanıb, ötən müddətdə siyasi, iqtisadi, humanitar və digər sahələrdə tərəflər arasında səmərəli əməkdaşlıq münasibətlərinin yaranıb inkişaf etdiyi bildirilib. İki ölkə arasında münasibətlərin inkişafında Azərbaycan xalqının ümummilli lideri Heydər Əliyevin və Prezident İlham Əliyevin Çinə səfərləri mühüm rol oynayıb.
Qeyd olunub ki, müxtəlif mədəniyyətlərin və sivilizasiyaların qovuşduğu məkan olan Azərbaycan zəngin mədəni irsi və multikultural dəyərləri ilə diqqət çəkən ölkədir.
Yazıda iki xalq arasında hələ qədim İpək yolu dövründən yaranan münasibətlərdən söz açılıb, Azərbaycanın dahi şairi Nizami Gəncəvinin “Yeddi gözəl” poemasında Çin gözəlindən bəhs olunduğu diqqətə çatdırılıb. Müasir dövrdə mədəniyyət sahəsində əməkdaşlığın möhkəmləndirilməsi istiqamətində müxtəlif layihələrin həyata keçirildiyi barədə məlumat verilib.
Bundan başqa, məqalədə Azərbaycanın son illər iqtisadi inkişafından, habelə pandemiyanın yaratdığı çətinliklərdən sonra iqtisadiyyatın uğurlu bərpasından, iki ölkənin COVID-19 pandemiyası ilə mübarizədə bir-birinə verdiyi dəstəkdən söz açılıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
