CİZGİ HEKAYƏLƏRİNİN SƏRGİ-MÜSABİQƏSİ KEÇİRİLMİŞDİR

14.03.2004 [13:41]
Çap et
A⁺ A^-

Azərbaycan Rəssamlar İttifaqının Vəcihə Səmədova adına sərgi salonunda “7 qəhrəman-Azərbaycan” mövzusunda cizgi hekayələrinin (komikslərin) sərgi-müsabiqəsi keçirilmişdir.

Rəssamlar İttifaqından AZƏRTAC-a bildirmişlər ki, respublikamızda ilk dəfə keçirilən sərgidə 20 rəssamın 7 qəhrəmanın (Tomris, Dədə Qorqud, Babək, Nəsimi, Koroğlu, Mehdi Hüseynzadə, Çingiz Mustafayev) təsvirinə həsr olunmuş 50-yə yaxın əsəri nümayiş etdirilir.

Sərginin keçirilməsində məqsəd 5-10 yaşlı uşaqlarımıza qəhrəmanlarımızı tanıtmaqdır. Müsabiqədə qalib gələn rəssamların iştirakı ilə adı çəkilən qəhrəmanlarımız haqqında geniş cizgi hekayələri hazırlanacaqdır.

Müxtəlif nominasiyalar üzrə Orxan Hüseynov, Mətanət Aslanova, Mais Əliyev, Tofiq Məmmədov və Etibar Aslanov müsabiqənin birinci mükafatına layiq görülmüşlər.

Gələcəkdə bu silsilədən Azərbaycanın başqa qəhrəmanlarına həsr olunmuş sərgilərin keçirilməsi nəzərdə tutulmuşdur.