Səhiyyə Nazirliyinin qərari ilə iyulun 3-dən “Funda” özəl tibb mərkəzinin fəaliyyəti dayandırılacaqdır. Bunu səhiyyə nazirinin müavini Elsevər Ağayev iyunun 30-da keçirilən mətbuat konfransında bildirmişdir. Səhiyyə və iqtisadi inkişaf nazirlikləri nümayəndələrindən ibarət komissiyanın keçirdiyi reyd zamanı bu mərkəzdə tibbi xidmətlərin göstərilməsində, sarğı materiallarının saxlanılmasında çoxsaylı pozuntu halları, klinikanın otaqlarının müalicə-profilaktika müəssisələri üçün dövlət tikinti normalarına uyğun gəlmədiyi, habelə vaxtı keçmiş reaktivlər aşkara çıxarılmışdır.
Digər özəl müəssisələrdə də yoxlamalar aparılır. 8 filialı üçün müvafiq lisenziyaları olmayan “Mediklab” klinikasının rəhbərliyinə xəbərdarlıq edilmişdir.
Xatırladaq ki, Səhiyyə Nazirliyinin apardığı yoxlamaların nəticələrinə əsasən, “Diamed” klinikasının fəaliyyəti dayandırılmışdır. Hazırda Səhiyyə Nazirliyinin lisenziyaları əsasında ölkədə 400 özəl tibb müəssisəsi fəaliyyət göstərir.
