“Dahmer”dən yeni rekord!
Bakı, 7 dekabr, AZƏRTAC
“Canavar: Cefri Dahmer hekayəsi” “Netflix” platformasında yeni rekorda imza atıb.
AZƏRTAC xəbər verir ki, rejissor Rayan Merfinin filmi uğurunu artırmaqda davam edir. Yayımlandığı gündən bu yana “Netflix”in ən çox izlənilən filmləri sırasında yer alan serial daha bir mərhələni keçərək 1 milyard saatlıq baxış sayı ilə yeni izləyici rekordu qırıb.
"Dahmer" hazırda “Netflix” tarixində 60 gün ərzində bu hədəfi aşan üç ekran əsərindən biridir. Bu uğuru paylaşan digər seriallar isə Cənubi Koreyanın "Squid Game" dram əsəri və qlobal hitə çevrilən "Stranger Things"in 4-cü mövsümüdür.
Məşhur aktyor Evan Petersinin baş rolu canlandırdığı "Dahmer" yeddi həftə ərzində “Netflix”in “Qlobal Top 10” cədvəlində 92 ölkədə ən çox izlənilən ekran əsəri olub. O, eyni zamanda “Netflix”in bütün zamanların ikinci ən populyar ingilis dilli serialı olaraq qalır.
Ekran əsəri Amerikanın ən məşhur seriyalı qatillərindən biri olan Cefri Dahmerin hekayəsindən bəhs edir. Cefri Dahmerin çətin uşaqlığı, onun dəhşətli cinayətləri və 1992-ci ildəki məhkumluğuna fokuslanan serial, onun illər ərzində qətl törətməsinə imkan yaradan sistem məsələlərinə də toxunur.
Qeyd edək ki, Amerikanın ən qəddar cinayətkarlarından biri hesab edilən Cefri Dahmer 1978-1991-ci illər aralığında 17 nəfərin həyatına son qoyub.
Onun qurbanlarının hamısı kişi olub. Cefri Dahmer 1991-ci il iyunun 22-də həbs edildi və məhkəmə prosesi televiziya ilə birbaşa translyasiya olunub.
Dahmerin vəkili onu psixi xəstə kimi göstərmək istəsə də, bu cəhd alınmadı. Məhkəmə ona ömürlük həbs cəzası verdi. 1994-cü ildə kamera yoldaşı Cefri Dahmerin başını dəmir parçası ilə əzərək öldürdü.
Bölmənin digər xəbərləri
