David Seliverstov: Albert Aqarunovun ruhu şaddır, çünki Azərbaycan artıq bütövdür
Bakı, 25 aprel, AZƏRTAC
“Albert Aqarunov milliyyətindən asılı olmayaraq, bu torpağın oğludur. O, Vətənini canından artıq sevən, tankını döyüş meydanında bir qalxan kimi irəli sürən igid əsgər idi. Onun timsalında biz bir daha anlayırıq ki, qəhrəmanlıq nə milləti, nə dini, nə dili tanıyır. Qəhrəmanlıq insanın ruhunda, ürəyində, vicdanındadır. Bütün şəhidlərimizə Allahdan rəhmət diləyirik. Albert Aqarunov cəmi 23 yaşında şəhid olub. Onun və digər şəhidlərimizin ruhu bu gün şaddır, çünki Azərbaycan artıq bütövdür və işğala məruz qalan torpaqları azad olunub”.
AZƏRTAC xəbər verir ki, bu sözləri “Magen David” Azərbaycan İnsan Hüquqları müdafiəsi və xeyriyyə cəmiyyətinin sədri, Ümumisrail Qafqaz Yəhudiləri Assosiasiyasının Azərbaycan nümayəndəliyinin rəhbəri David Seliverstov jurnalistlərə açıqlamasında söyləyib.
O vurğulayıb ki, Azərbaycanın Milli Qəhrəmanı Albert Aqarunovun anım günü bütün şəhidlərin anım günüdür: “Azərbaycan tolerant xalqdır. Millətindən, dinindən, irqindən asılı olmayaraq qəhrəmanlıq hər kəsin qəlbində yaşamalıdır. Albert bir yəhudi millətinin övladı olsa da, o, həm də Azərbaycan oğludur. Xalqımızın qəhrəman övladları hər zaman uca tutulmalıdır. Biz inanırıq ki, gələcəkdə də digər qəhrəmanlarımızın xatirəsinə həsr olunmuş tədbirlər təşkil ediləcək və bu kimi təşəbbüslər Azərbaycanımızın daha da güclənməsinə xidmət edəcək”, - deyə David Seliverstov əlavə edib.
Bölmənin digər xəbərləri
