Dekorativ-Tətbiqi Sənət Festivalına sənət əsərlərinin qəbulu davam edir
Bakı, 18 sentyabr, AZƏRTAC
“Art Tower” rəsm qalereyasında ənənəvi olaraq elan edilən Dekorativ-Tətbiqi Sənət Festivalına sənət əsərlərinin qəbulu davam edir.
Bu barədə AZƏRTAC-a məlumat verən “Arts Concil Azerbaijan” qeyri-hökumət təşkilatının rəhbəri Dadaş Məmmədov deyib ki, festivala batika, qobelen, keramika, şəbəkə, xalça növlərinə aid əsərlərlə müraciət etmək olar. Onun sözlərinə görə, festivalın məqsədi dekorativ-tətbiqi sənət növlərini təbliğ etmək, gənc nəsil arasında maraq yaradaraq bu milli sənət növlərinin inkişafına kömək etməkdir.
Festival Gənclər Şəbəkəsi, “İçərişəhər” Dövlət Tarix-Memarlıq Qoruğu İdarəsi, Azərbaycan Dövlət Rəsm Qalereyası, Mədəniyyət Nazirliyi və “Arts Concil Azerbaijan” qeyri-hökumət təşkilatının dəstəyi ilə təşkil olunub.
Festival adət-ənənələri qorumaq, gənclərin əl işlərini nümayiş etmək üçün böyük imkan yaradır, ölkənin dekorativ-tətbiqi sənət aləmində ənənəvi bayram xarakteri daşıyır. İştirakçılar əsərlərinin fotosunu [email protected] elektron ünvana göndərə bilərlər.
Hər iştirakçı beş əsərinin fotosunu göndərə bilər. Fotolar kiçik ölçüdə olmalıdır. Festivala son müraciət tarixi sentyabrın 30-da başa çatır.
Bölmənin digər xəbərləri
