Deputat: Azərbaycan tək regionda deyil, dünyada sülhün davamlılığında maraqlı olduğunu göstərir
Bakı, 9 mart, AZƏRTAC
Bu gün Bakıda keçirilən “Dünya bu gün: Çağırışlar və ümidlər” mövzusunda X Qlobal Bakı Forumu mühüm beynəlxalq tədbirdir. Bir çox ölkələrin, eləcə də nüfuzlu beynəlxalq təşkilatların nümayəndələrinin qatıldığı Forumda dünya üçün önəmli məsələlər müzakirə edilir.
Bunu AZƏRTAC-a açıqlamasında Milli Məclisin deputatı Arzu Nağıyev bildirib.
O qeyd edib ki, Forumda dörd prezident, iki Baş nazir, altı spiker və nazir, BMT-nin 5 qurumunun rəhbərləri, 25 sabiq prezident, 21 sabiq Baş nazir, 23 ölkənin xarici işlər nazirlərinin müavinləri olmaqla, ümumilikdə 61 ölkədən 360-dək nümayəndə iştirak edir.
Deputat əlavə edib ki, tədbirdə regionun təhlükəsizlik məsələləri o, cümlədən dəhlizlərdən logistika kimi istifadə olunmasına dair müzakirələrin aparılması düşünülmüş fikirdir. Forumda yeni dünya nizamına təhdid yaradan amillərə, o cümlədən təhlükəsizlik məsələsinə və sülhün təmin olunması üçün perspektivlərə, parçalanmış dünyada dayanıqlılığın qurulmasına, onun qlobal sülhə təsirinə nəzər salınacaq.
“Bu mövzuların Forumun gündəliyinə salınması Azərbaycanın tək regionda deyil dünyada sülhün davamlılığında maraqlı olduğunu göstərir. Müzakirələr Azərbaycanla Ermənistan arasında sülh müqaviləsinin imzalanmasına və Qarabağda tam sabitliyin həll olunmasına öz müsbət təsirini göstərəcək. Bundan başqa insan haqları ilə bağlı bir sıra məsələlərin həlli istiqamətində tövsiyələr veriləcək”, - deyə Arzu Nağıyev bildirib.
Onun sözlərinə görə, Prezident İlham Əliyev məqsədli olaraq beynəlxalq ictimaiyyətin diqqətini Azərbaycanda insan haqlarının qorunmasına yönəldib. Azərbaycan Prezidenti çıxışında bildirib ki, müxtəlif etnik qrupların və konfessiyaların nümayəndələri Azərbaycanda ləyaqətli və dinc şəraitdə yaşayırlar. Dövlətimizin başçısı, həmçinin əlavə edib ki, Azərbaycanın Qarabağ regionunda yaşayan ermənilərin həyatı işğal dövründən fərqli olaraq, bundan sonrakı dövrdə daha yaxşı olacaq.
Milli Məclisin deputatı qeyd edib ki, beynəlxalq tədbirdə qlobal yoxsulluğun, bərabərsizliyin, iqlim böhranının və münaqişələrin simptomu kimi miqrasiyanın qarşısının alınması üçün tədbirlər əsas müzakirə mövzularından olacaq.
Bölmənin digər xəbərləri
