SİYASƏT
Deputat: Azərbaycan və Latviya beynəlxalq arenada strateji tərəfdaşdır
Bakı, 9 mart, AZƏRTAC
Azərbaycanın xarici siyasət kursunun əsas istiqaməti olan qarşılıqlı əməkdaşlıq və tərəfdaşlıq prinsipləri uğurla davam etdirilir. Ölkəmiz həm siyasi, həm iqtisadi münasibətlərin qurulmasında müxtəlif hərbi və geopolitik mövqeyə fərq qoymadan bütün dövlətlərlə diplomatik əlaqələrin yaradılmasına hər zaman açıqdır, lakin burada şübhəsiz, başlıca meyar dünyada sülhün bərqərar olunması və milli maraqların gözlənilməsidir. Bu baxımdan rəsmi Bakının son diplomatik təmaslarını izlədikdə ölkəmizin regional güc mərkəzi kimi önə çıxması müşahidə olunur.
Azərbaycana rəsmi səfərə gələn Latviya Respublikasının Prezidenti Egils Levitsin keçirdiyi görüşlər də ölkəmizin geosiyasi mövqeyinin növbəti göstəricisi sayılmalıdır.
Bu fikirləri AZƏRTAC-a açıqlamasında Milli Məclisin deputatı, YAP İdarə Heyətinin üzvü Rəşad Mahmudov söyləyib.
O bildirib ki, Latviya ilə Azərbaycan arasında münasibətlər tarixi köklərə malikdir. Keçmiş sovet dövründə yaranan bu münasibətlər dövlət müstəqilliyinin qazanılmasından sonra daha da yaxınlaşmış və möhkəmlənmişdir. Bir neçə il əvvəl ölkələrimiz arasında Strateji Tərəfdaşlıq haqqında Bəyannamənin imzalanmasından sonra Azərbaycan və Latviya beynəlxalq arenada strateji tərəfdaş kimi birgə siyasət yürüdüb. Latviyanın bütün dövrlərdə Azərbaycanın ərazi bütövlüyü ilə bağlı qəti mövqedə olması dövlətlərarası əlaqələri daha da gücləndirib. Latviya ilə Azərbaycan arasında xüsusi diqqət çəkən məqamlardan biri də Azərbaycanla Avropa İttifaqı arasındakı münasibətlərdir. Belə ki, Prezident İlham Əliyevin yürütdüyü mükəmməl xarici siyasətin nəticəsi kimi Azərbaycan hər zaman Avropa Komissiyası tərəfindən son dərəcə etibarlı tərəfdaş hesab edilib. Ölkəmiz uzun illərdir ki, enerji təhlükəsizliyində Avropa üçün əvəzsiz strateji müttəfiqdir və biz neft, təbii qaz, elektrik enerji, neft-kimya, neft məhsullarının ixracında Avropa bazarında ciddi mövqeyə malikik. Bu tərəfdaşlığın davamı kimi Azərbaycan qarşıdakı dövrdə "yaşıl enerji" ixrac etməyə hazırlaşır. Onu da qeyd edək ki, Azərbaycan Strateji Tərəfdaşlıq haqqında Bəyannaməni, yaxud sazişləri Avropa İttifaqının doqquz üzvü ilə imzalayıb.
Ümumiyyətlə, Prezident İlham Əliyev Avropa İttifaqı ilə münasibətlərin yüksəlməsinə xüsusi önəm verir və proses sazişin tam şəkildə imzalanmasına doğru gedir. Bu baxımdan Latviya Avropa İttifaqının üzvü kimi mühüm mövqeyə sahibdir və ölkəmiz ikitərəfli münasibətlərin inkişafında maraqlıdır.
Bölgədə davamlı sülhə nail olunmasının vacibliyini ali qonağın diqqətinə çatdıran Prezident İlham Əliyev 28 il nəticəsiz qalan danışıqların hərbi əməliyyatlarla nəticələndiyini və işğal edilmiş ərazilərimizin azad olunduğunu bildirdi. Ölkə başçısı bir daha bəyan etdi ki, Ermənistan konstruktiv mövqe sərgiləsəydi, problem hərb yolu ilə deyil, danışıqlarla həllini tapardı. Prezident ərazilərimizi dağıntılara, uzunmüddətli işğala məruz qoymasına baxmayaraq Ermənistanın beynəlxalq iştirakçıların da dəstəklədiyi Azərbaycanın sülh təklifinə müsbət cavab verəcəyinə əminliyini bildirərək sülh şəraitində yeni Cənubi Qafqazın qurulmasının anonsunu verdi.
Milli Məclisin deputatı bildirib ki, dövlətimizin başçısı Baltik ölkələr arasında sıx əməkdaşlıq və inteqrasiyaya da toxundu. Qeyd etdi ki, bu ölkələr uzun illərdir ki, Avropa İttifaqının və NATO-nun üzvləridir, uğurla inkişaf edirlər. Cənubi Qafqazda isə fərqli vəziyyətin - müharibələrin, separatizmin, terrorçuluğun, ekstremizm kimi dəhşətli vəziyyətin olduğunu diqqətə çatdıran Prezident İlham Əliyev buna son qoyulduğu təqdirdə Baltik ölkələri kimi, Cənubi Qafqazın da inkişaf etmək şansının olacağını bildirdi.
Şübhəsiz ki, Azərbaycan əmin-amanlığın, sabit həyatın təminatçısı kimi, bütövlükdə bölgənin inkişafında maraqlıdır.
Deputat sonda qeyd edib ki, göründüyü kimi, Latviya Prezidentinin ölkəmizə səfəri iki dövlət arasında münasibətlərdə yeni səhifənin başlanğıcı olacaq. Eyni zamanda, bu səfər Azərbaycanın beynəlxalq arenada mövqelərinin möhkəmlənməsində olduqca əhəmiyyətlidir. Ümumiyyətlə, Azərbaycan Prezidenti İlham Əliyevin birbaşa diqqətində olan xarici siyasət kursu ölkəmizin regional güc mərkəzinə çevrilməsinə xidmət edir və bu istiqamətdə ciddi nəticələr əldə olunub.