Deputat: İran anlamır ki, regionda Azərbaycan-Türkiyə birliyi mövcuddur
Bakı, 27 oktyabr, AZƏRTAC
İran Azərbaycanla dövlət səviyyəsində münasibətlərini genişləndirmək istədiyini və qonşuluq əlaqələrinə hörmətlə yanaşdığına bildirsə də, pərdə arxasında ermənipərəst siyasətini dərinləşdirir və regionda sülhün, sabitliyin yaranmasına əngəl törədir. Belə ki, İranın xarici işlər naziri Hüseyn Əmir Abdullahianın Ermənistana səfəri çərçivəsinə ölkələr arasında iqtisadi əməkdaşlığın genişləndirilməsindən danışılıb, ticarət dövriyyəsinin 700 milyon dollardan 1 milyard dollara çatdırılması niyyəti bəyan edilib. Həmçinin İran tərəfi Ermənistanın ərazisindən keçən Şimal-Cənub beynəlxalq tranzit marşrutunu özləri üçün böyük əhəmiyyət kəsb etdiyini bildirib. Bu davranış isə heç bir məntiqə sığmır. Çünki İran-Ermənistan rəsmilərinin görüşündə qeyd olunan dövriyyənin əsas hissəsini rəsmi Tehrandan ixrac olunan neft və neft məhsulları təşkil edir. Çünki Ermənistanın sənayesindən İrana ixrac olunacaq mallar yox dərəcəsindədir. İran XİN-in Ermənistanı Şimal-Cənub nəqliyyat dəhlizinin tərkib hissəsi görmək istəməsi isə gülüncdür. Çünki İranla Ermənistan arasındakı nəqliyyat-kommunikasiya ancaq Zəngəzurdan keçən Gorus-Qafan yoludur. Bu yolun da bir hissəsi və beynəlxalq daşımalarda əsas nəqliyyat hesab olunan dəmir yolu ölkəmizin ərazisindən keçir. Azərbaycanla Ermənistan arasında sülh müqaviləsi imzalanmasa, İran heç bir halda düşmən dövlət vasitəsilə dəmir yolu ilə beynəlxalq daşımalarda iştirak edə bilməz. Ona görə də Ermənistanın özünün qonşu dövlətlərə çıxışa ehtiyacı olduğu halda, iranlı nazirin bu ölkəni Şimal-Cənub nəqliyyat dəhlizinin bir hissəsi kimi görməsi ciddi yanaşma sayılmır.
Bu fikirləri AZƏRTAC-a açıqlamasında Milli Məclisin deputatı Azər Badamov söyləyib.
Deputat bildirib ki, iranlı nazir Ermənistanın təhlükəsizliyi regionun təhlükəsizliyi olduğunu deyib. Hüseyn Əmir Abdullahian nədənsə demək istəmir ki, regionda təhlükəsizliyin bərpa olunmasına maneə yaradan başlıca amil Ermənistandır. Çünki keçirilmiş üçtərəfli görüşlərdə Ermənistan Zəngəzur dəhlizinin açılması və Qarabağın ermənilər yaşadığı ərazilərdən hərbi birləşmələrinin çıxarılması ilə bağlı öhdəlik götürüb və onları icra etmir. Əgər İran regionda təhlükəsizlik istəyirsə, Ermənistanı öz öhdəliklərini yerinə yetirməyə çağırmalıdır. Amma İran bunun tam əksinə olaraq, ermənipərəst mövqedən çıxış edərək atdığı addımlarla regionda təhlükəsizliyin yaranmasına qarşı olduğunu nümayiş etdirir. Hətta qeyd edə bilərik ki, Ermənistanın özü İrana o qədər hörmətlə yanaşmasa da, rəsmi Tehran İrəvanın arxasınca düşüb. İranlı nazirin Ermənistanda Nikol Paşinyanın qəbuluna düşmək üçün üç gün gözləməsi bu məsələnin əyani sübutudur.
“Nəticə olaraq qeyd edə bilərik ki, İran müxtəlif üsullarla Ermənistana dayaq durmaq istəyini ifadə edərək, ölkələrimiz arasında sülh müqaviləsinin imzalanmasına mane olmağa çalışır. Qafanda baş konsulluğun açılması İran üçün vacib idi? Təbii ki, xeyr. Ermənistanda nə qədər iranlı var ki, Qafanda da bu ölkənin konsulluğu yaradılsın və xidmət göstərsin. Həmçinin Azərbaycanla sərhədə bütün qoşun növlərini cəlb edərək, hətta Araz çayı üzərində panton körpülər qurmaqla genişmiqyaslı hərbi təlimlərin keçirilməsinin də İran üçün vacib olduğu heç bir məntiqə sığmır. Əgər İran ordusunun peşəkarlığını artırmaq məqsədilə hərbi təlimlər keçirilirdisə, sual olunur ki, torpaqlarımız erməni işğalında olduğu 30 ildə niyə bu cür davranışlar sərgilənmədi? İranın bütün bu hərəkətləri Ermənistanı yenidən müharibəyə ruhlandırmaq istiqamətində ölkəmizə “əzələ nümayişi” kimi qiymətləndirmək olar. Sual olunur ki, İran niyə riyakar və ermənipərəst siyasətini dərinləşdirir. Hesab etmək olar ki, İran Türk dünyasının birləşməsindən qorxur və bütün imkanlarını işə salaraq buna mane olmaq istəyir. Amma İran anlamır ki, regionda artıq Azərbaycan-Türkiyə birliyi mövcuddur. Bu yeni güc regiona uzunmüddətli sülhün gəlişinin təminatçısı olacaq. Azərbaycan-Türkiyə birliyi beynəlxalq normalara uyğun şəkildə ölkəmizin bütün hüquqlarının təmin edilməsinə qadirdir. İran yəqin yaddan çıxarıb ki, ölkəsində 40 milyona qədər azərbaycanlı var. Bundan əlavə, ordusunun böyük hissəsi azərbaycanlılardan ibarətdir. Əgər ciddi təhdid yaranarsa, Azərbaycanın bu istiqamətdə təsir imkanları genişdir. Amma ölkəmiz qonşu dövlətlərin müstəqilliyinə, suveren ərazilərinə hörmətlə yanaşır. Bundan əlavə, heç kimə də öz haqqını tapdalamağa imkan verməyəcək”, - deyə A.Badamov vurğulayıb.
Bölmənin digər xəbərləri
