Deputat: İslahatlar cari ili az itkilərlə başa vurmağa imkan verəcək
Bakı, 20 iyul, AZƏRTAC
Prezident İlham Əliyevin sədrliyi ilə Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclası ölkənin iqtisadi perspektivləri barədə aydın təsəvvür yaradır.
AZƏRTAC xəbər verir ki, Milli Məclisin deputatı Azər Badamov bu məsələyə münasibət bildirərkən deyib: “2019-cu ildə dövlət idarəetmə sistemində və qanunvericilikdə davam etdirilən geniş islahatlar dünyanı bürüməyə başlamış yeni iqtisadi böhran dövründə ölkə iqtisadiyyatını 2020-ci ili az itkilərlə başa vurmağa imkan verəcək. Cari ilin 6 ayının makroiqtisadi göstəricilərində pandemiyanın dünya iqtisadiyyatına göstərdiyi mənfi təsirləri fonunda ölkəmizdə cəmi 2,7 faiz geriləməni pis nəticə hesab etmək olmaz. Neftin qiymətinin kəskin ucuzlaşmasına, qlobal pandemiyanın təsirindən bir çox sahələrin fəaliyyətlərinə məhdudiyyətlər qoyulmasına, gəlirlərin azalmasına baxmayaraq, yarım ildə dövlət büdcəsinin icrasında çətinliyin yaranmamasını ölkədə icra olunan iqtisadi proqramların uğuru hesab edirəm. ÜDM-in azalmasının dünyada baş verən proseslərin tərkib hissəsi olduğunu nəzərə alaraq qeyd etmək istəyirəm ki, iqtisadiyyatın şaxələndirilməsi siyasətinin vaxtında həyata keçirilməyə başlanması cari ilin 6 ayında kənd təsərrüfatı 2,2 faiz, qeyri-neft sənayesi isə 11 faiz artmaqla ilin əvvəlindən qeydə alınmış artım templəri qorunmaqdadır. Bu gün pandemiyanın təsirindən turizm sektorunda 48 faiz, tikintidə 14,5 faiz azalma müşahidə olunur. İqtisadi fəallığın qorunması və əhalinin sosial rifahına dəstək proqramlarının icrasına 3,5 milyard manat vəsait ayrılıb”.
“Qlobal pandemiyanın ölkə həyatına kəskin təsir göstərdiyi bir zamanda ölkədə iqtisadi inkişafın və əhalinin sosial rifahının qorunması üçün İqtisadiyyat Nazirliyi qarşısında yeni vəzifələr qoyuldu. Bu, üç əsas hədəfdən - makroiqtisadi sabitliyin qorunmasından, iş yerlərinin və məşğulluğun saxlanılmasından, məşğulluğun inkişafı və büdcə gəlirlərinin iqtisadi bazası olan daxili tələbin və investisiyaların dəstəklənməsindən ibarətdir. Bu hədəflərin icrası üçün kölgə iqtisadiyyatının aradan qaldırılması və şəffaflığın təmin olunması istiqamətində atılan addımların davamlı olması vacib şərtdir. Cari ilin 6 ayında vergi və gömrük orqanları xətti ilə ilin əvvəlində proqnozda nəzərdə tutulduğundan 425 milyon manat əlavə vəsaitin dövlət büdcəsinə mədaxil olunması ölkədə kölgə iqtisadiyyatının azalmasının göstəricisidir. Altı ayda qeyri-neft ÜDM-in 2,1 faiz azalmasına baxmayaraq, ticarət əməliyyatlarında rəsmiləşdirilmələrin şəffaflaşdırılması sayəsində ƏDV depozit hesabına mədaxilin 6,8 faiz artması və digər tədbirlər dövlət büdcəsi qarşısındakı müasir dövrün çağırışlarına uyğun yeni öhdəliklərin icrasına imkan verir”, - deyə deputat bildirib.
A.Badamov, həmçinin qeyd edib ki, ictimai iaşə və pərakəndə ticarət xidmətlərində nağdsız əməliyyatların həcminin artırılmasının stimullaşdırılması məqsədilə may ayının 1-dən alınmış mallara görə ödənilmiş ƏDV-nin geri qaytarılması layihəsinin icrası kölgə iqtisadiyyatının azaldılması tədbirlərində vətəndaşların fəallığını daha da artırır. İndiyədək 10 milyon 400 min çek üzrə 2,7 milyon manat ƏDV istehlakçılara qaytarılıb, 2,4 milyon manat isə 30 gün tamamlananda qaytarılacaq. Təbii ki, fərdi yanaşılmaqla hər bir vətəndaşın iqtisadiyyatın şəffaflaşmasına cəlb olunması ölkəmizin inkişafın yeni mərhələsinə keçidini sürətləndirəcək.
Bölmənin digər xəbərləri
