Deputat: Möhkəm təmələ əsaslanaraq müəyyənləşdirilən hədəflərin uğurlu icrası Azərbaycanı daha da qüdrətləndirəcək
Bakı, 23 aprel, AZƏRTAC
Prezident kimi fəaliyyətə başladığı gündən iqtisadi artımın qeyri-neft sektorunun hesabına olmasını qarşıya mühüm vəzifə kimi qoyan dövlətimizin başçısı İlham Əliyevin son 17 ildə bu istiqamətdə atdığı addımlar yalnız statistik rəqəmlərdə deyil, insanların gündəlik həyatında, inkişafın dəyərləndirilməsində və perspektivlərin müəyyənləşdirilməsində əhəmiyyətli rol oynayan beynəlxalq maliyyə qurumlarının hesabatlarında da əksini tapır. Fəaliyyətində reallığa və praqmatizmə əsaslanan Prezident İlham Əliyevin qarşıya qoyduğu əsas hədəf Azərbaycanı beynəlxalq iqtisadi münasibətlər sistemində yüksək rəqabətqabiliyyətli ölkə kimi tanıtmaqdır. Bu məqsədə çatmaq üçün bazar iqtisadiyyatı şəraitində sağlam rəqabəti təmin edən səmərəli dövlət tənzimlənməsi, enerjidən səmərəli istifadə, yüksək əlavə dəyər yaradan ixracyönümlü iqtisadiyyata nail olmaq, sosial-iqtisadi sahələrin inkişafına kompleks yanaşma prinsiplərinə diqqətin artırılması tələb olunur. Dövlətimizin başçısı İlham Əliyevin Hacıqabul rayonuna səfəri zamanı bir neçə sosial obyektin açılışı bir daha göstərdi ki, insan amili dövlət siyasətinin əsasını təşkil edir. İnsanların rahat, təhlükəsiz yaşayışı, sosial müdafiəsinin gücləndirilməsi, sosial xidmət sahəsində şəffaflığın təmin olunması, insanların hər addımda dövlətin diqqət və qayğısını hiss etməsi vətəndaş məmnunluğunun artırılmasında stimulverici amildir. Günümüzün əsas çağırışlarından olan ərzaq təhlükəsizliyinin təmin edilməsi, iqtisadiyyatın ən müasir texnologiyalar və elmi əsaslar üzərində qurulması ilə qeyri-neft sektorunun inkişafı da bu məqsədlərə xidmət edir.
Bu fikirləri AZƏRTAC-a açıqlamasında Milli Məclisin deputatı Malik Həsənov bildirib.
M.Həsənov qeyd edib ki, Prezident İlham Əliyev Hacıqabula səfəri çərçivəsində Azərbaycan Televiziyasına müsahibəsində də yeni istifadəyə verilən sosial obyektlərin rayonun gələcək inkişafında mühüm rol oynayacağını önə çəkərək, əsas hədəfləri açıqladı. Bildirildi ki, aqroparkların yaradılması ölkəmizdə kənd təsərrüfatı sahəsində aparılan islahatların tərkib hissəsidir.
Deputat qeyd edib ki, böyük aqroparkların yaradılmasının əsas məqsədi ərzaq təhlükəsizliyini təmin etməkdir. Ümumi sayı 50-yə çatdırılacaq aqroparklar kənd təsərrüfatının inkişafında mühüm rola malikdir. Bölgələrdə yaradılan fermer təsərrüfatlarının səmərəli fəaliyyəti məşğulluq problemini də aradan qaldırır. Hacıqabulda “Aqro Dairy” MMC-nin aqroparkının və “Azərsun Şamaxı Aqropark”ın açılışı nümunəsində Azərbaycanda müxtəlif bölgələrdə yaradılmış aqroparklar haqqında ümumiləşdirilmiş məlumat, istehsal, emal və logistikanın bir müəssisə çərçivəsində cəmləşdirmənin səmərəsi özünün aydın ifadəsini tapır.
Prezident İlham Əliyevin müsahibəsində işğaldan azad edilmiş torpaqlarda görülən işlərlə bağlı fikirlərinə diqqət çəkən M.Həsənov bildirib ki, Azərbaycanın hər bir bölgəsi, o cümlədən işğaldan azad edilmiş rayonlar zəngin potensiala malikdir. Mərhələlər üzrə görülən işlər sonda vətəndaşların bu ərazilərə Böyük Qayıdışı və torpaqlarımıza yeni nəfəsin verilməsi ilə müşayiət olunacaq. Qeyri-neft sektorunun inkişafı üçün daha böyük imkanlar yaranacaq. Hazırda ərazilərimizin minalardan təmizlənməsi həyata keçirilməklə yanaşı, infrastruktur layihələri də reallaşdırılır. Yol, nəqliyyat infrastrukurunun həlli prioritetliyini qoruyur. Dövlətimizin başçısı İlham Əliyev və birinci xanım Mehriban Əliyeva mütəmadi olaraq işğaldan azad edilmiş ərazilərimizə səfər edərək həm torpaqlarımızı sahiblərinin gəlişi ilə sevindirir, həm də görülən işlərlə yaxından tanış olurlar. Bu ərazilərimizdə müasir idarəetmə sistemi yaradılır. Həmçinin “ağıllı şəhər” və “ağıllı kənd” layihələri icra olunur. İcrası nəzərdə tutulan hər bir layihə, irəli sürülən hər bir təşəbbüs özündə müasirliyi, yeniliyi əks etdirir. Bu da onun təsdiqidir ki, dövlətimizin başçısı İlham Əliyevin həyata keçirdiyi siyasətin əsasında zamanın, dövrün tələbinə uyğun təkmilləşmə dayanır. Dövlətimizin başçısı bu məqamı da xüsusi qeyd etdi ki, xaricdən bir çox təkliflər gəlməkdədir. Xarici tərəfdaşlarımız Qarabağın bərpası işində fəal iştirak etmək istəyirlər. Təbii ki, bütün təkliflər təhlil ediləcək və müzakirə olunacaq. Əsas məqsəd işləri maksimum səmərə ilə görmək, azad edilmiş torpaqlara qayıdacaq vətəndaşlar üçün ən gözəl şəraiti yaratmaqdır.
Möhkəm təmələ əsaslanaraq müəyyənləşdirilən hədəflərin uğurlu icrasının innovasiyalar ölkəsi kimi tanınan Azərbaycanı daha da qüdrətləndirəcəyini bildirən Malik Həsənov vurğulayıb ki, “Görülmüş işlərlə kifayətlənməməliyik, daim irəliyə baxmalıyıq” çağırışını edən dövlətimizin başçısı kənd təsərrüfatı və sənayedə potensialın yüksəlməsini, istehsalın artmasını “Azərbaycan Respublikası regionlarının 1919-2023-cü illərdə sosial-iqtisadi inkişafı Dövlət Proqramı”nın başlıca hədəfləri kimi qeyd edir. Kompleks tədbirlər qarşıya qoyulan bütün məqsədlərə nəzərdə tutulan vaxtda nail olmağa geniş imkanlar yaradır.
Bölmənin digər xəbərləri
