DEPUTATLARIMIZ NAZİRLƏR KOMİTƏSİNİN SƏDRİNƏ SUALLARLA MÜRACİƏT ETMİŞLƏR
İyunun 29-da A.Qruşko hesabat məruzəsi ilə çıxış etdikdən sonra deputatların Nazirlər Komitəsinin sədrinə ünvanlanmış suallarını cavablandırmışdır. Sədrə ünvanlanmış 25 sualdan 3-nü azərbaycanlı deputatlar vermişdir.
Azərbaycan nümayəndə heyətinin üzvü Rafael Hüseynov sədrə aşağıdakı sualla müraciət etmişdir: Nəzərə alaraq ki, Avropa Şurası 1416 saylı (2005-ci il) qətnaməsində Ermənistanı birmənalı şəkildə təcavüzkar adlandırmış və azərbaycanlılara qarşı etnik təmizləmə siyasəti aradığını təsdiq etmişdir ;
Nəzərə alaraq ki, hərbi təcavüz nəticəsində Azərbaycan ərazilərinin 20 faizini zəbt edərək, son 15 il ərzində işğal altında saxlayan Ermənistan BMT-nin, Avropa Şurasının, Rusiyanın da üzv olduğu ATƏT-in Minsk qrupunun, digər benəlxalq təşkilatların qətnamələrini, problemi sülh yolu ilə həll etmək təklifləri və təkidlərinə baxmayaraq, işğalın miqyaslarını genişləndirmək, Azərbaycanın Naxçıvan Muxtar Respublikasını da ələ keçirmək niyyətlərini gizlətmir;
Nəzərə alaraq ki, Ermənistan münaqişəni bir qədər də qızışdırmaq üçün yeni təxribatlar törətməkdən çəkinmir və bu məqsədlə zəbt olunmuş Ağdam və Füzuli rayonlarının son həftələrdə bir çox kəndlərində yüz hektarlarla ərazini əhatə edən, floranın, faunanın, məhsuldar torpaq qatının, eləcə də oradakı qədim abidələrin, maddi mədəniyyət nümunələrinin, tarixi qəbiristanlıqların məhv olmasına gətirib çıxaran kütləvi yanğınlar törətmişdir.
Bütün bunlara əsasən Nazirlər Komitəsindən soruşulur: Rusiyanın Minsk qrupunda təmsil olunmasını, Rusiyanın bu problemin həllində əsas təsirli rol oynamaq imkanına malikliyi də əlavə edilməklə indi Nazirlər Komitəsinin sədri səlahiyyətlərinizdən də istifadə edərək yanğınların qarşısının təxirə salınmadan alınması üçün Ermənistana hansı təsirlər göstərməyə və bütövlükdə münaqişənin cürətli həllinə nə kimi töhfə verməyə çalışacaqsınız?
Deputatlar Aydın Mirzəzədə və Qənirə Paşayeva isə Dağlıq Qarabağ münaqişəsinin həllində Rusiyanın Nazirlər Komitəsinin sədri kimi hansı addımlar atacağı barədə sualla müraciət etmişlər.
Azərbaycanlı deputatların suallarını cavablandıran Nazirlər Komitəsinin fəaliyyətdə olan sədrinin müavini Aleksandr Qruşko bildirmişdir ki, Rusiya bu münaqişənin həllində maraqlıdır, ATƏT-in Minsk qrupu çərçivəsində mümkün səylərini göstərir.
Avropa Şurasının problemin həllinə təsiri yalnız danışıqların sürətləndirilməsi, problemin diplomatik yolla həlli üçün mümkün vasitələrdən istifadə səviyyəsində ola bilər. Əsas iş isə Minsk qrupunun üzərinə düşür və bu təşkilat həlledici rol oynaya bilər.
Sədr müavini qeyd etmişdir ki, istənilən halda bütün vasitəçilərdən daha mühüm funksiya münaqişə edən tərəflərin üzərinə düşür. Ona görə də həm Ermənistan, həm də Azərbaycan tərəfi Avropa Şurası qarşısında götürdükləri öhdəliklərə uyğun olaraq, bu məsələnin sülh yolu ilə beynəlxalq hüquq normaları çərçivəsində həllinə nail olmaq üçün daha qəti addımlar atmalıdırlar.
Bölmənin digər xəbərləri
