Azərbaycan idmançısı Dinara Gimatova İspaniyanın Saraqosa şəhərində bədii gimnastika üzrə Dünya kubokunun uğrunda yarışların 3-cü mərhələsində çoxnövçülükdə səkkizinci yer tutmuşdur.

Milli Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, Dinara çıxışlarının yekunlarına əsasən, 97,25 bal toplamışdır. O, gürzlərlə hərəkətlərin yerinə yetirilməsində daha yaxşı nəticə göstərmişdir.

Fəxri kürsünün ilk iki pilləsinə rusiyalılar İrina Çaşina və Alina Kabayeva, üçüncü pilləsinə isə belaruslu İnna Jukova qalxmışlar.

Ümidvarıq ki, idmançımız sentyabrın 24-28-də Budapeştdə keçiriləcək dünya çempionatında uğurla çıxış edəcəkdir. Birincilikdə gimnastlar 2004-cü ilin Olimpiya oyunlarına lisenziyalar uğrunda da mübarizə aparacaqlar. Bundan ötrü Dinara Gimatova çoxnövçülükdə planetin 15 ən yaxşı gimnastı sırasına çıxmalıdır. İndi o, Moskva yaxınlığındakı Novoqorsk olimpiya bazasında qarşıdakı məsul yarışa hazırlaşır.