Direktor: Kitab sərgiləri nəşriyyat işinin inkişafı baxımından xüsusi əhəmiyyət daşıyır
Bakı, 8 oktyabr, Günel Əliyeva, AZƏRTAC
Belə sərgilərin, xüsusən də kitab sərgilərinin təşkili böyük əhəmiyyət kəsb edir. Mədəniyyət Nazirliyinə və təşkilatçılara bu təşəbbüsə görə dərin minnətdarlığımı bildirirəm. Məhz belə yarmarkalar sayəsində çox sayda müəllif, nəşriyyat, oxucu, ümumiyyətlə kitabsevərlər bir araya gəlir və fikir mübadiləsi aparmaq imkanı əldə edirlər.
Bunu AZƏRTAC-ın müxbiri ilə söhbətində XI Bakı Beynəlxalq Kitab Sərgisi çərçivəsində “Şərq-Qərb” nəşriyyatının direktoru Sevil İsmayılova deyib.
“Azərbaycanda tez-tez belə bir fikir səslənir ki, guya gənclər oxumağa maraq göstərmirlər. Lakin sərgidə müşahidə etdiyimiz mənzərə bunun əksini göstərir. Ziyarətçilərin əksəriyyəti gənclərdir. Onlar yeni nəşrlərlə maraqla tanış olur, təqdimat və müzakirələrdə fəal iştirak edirlər”, – deyə o bildirib.
Onun sözlərinə görə, nəşriyyat tərəfindən keçirilən tədbir və təqdimatlarda da ən fəal iştirakçılar məhz gənclərdir.
“Bu, sevindirici haldır və bir daha sübut edir ki, belə sərgilər çox vacibdir. Üstəlik, xarici qonaqlar da gəlirlər ki, bu da xüsusilə dəyərlidir. Tarixi Qələbəmizdən sonra dünyada Azərbaycana maraq artıb və xarici iştirakçılar böyük diqqətlə bizim kitablar və nəşriyyat layihələrimizlə tanış olurlar”, – deyə direktor vurğulayıb.
S.İsmayılova bildirib ki, sərgi çərçivəsində yalnız yeni yerli nəşrlər deyil, həm də xarici nəşriyyatların kitabları təqdim olunur.
Nəşriyyat rəhbəri sərgi çərçivəsində təqdim edilən “Vətən müharibəsinin tarixi – Azərbaycanın ərazi bütövlüyünün bərpası. Şəxsiyyət amili” adlı kitabın təqdimatını xüsusi qeyd edib. Nəşr 44 günlük Vətən müharibəsinə və bu böyük Qələbədə şəxsiyyətin roluna həsr olunub, Müzəffər Ali Baş Komandan, Prezident İlham Əliyevin Qələbəyə töhfəsini əks etdirir. Layihə Bakı Şəhər İcra Hakimiyyəti və Azərbaycan Milli Elmlər Akademiyasının Tarix və Etnoqrafiya İnstitutunun dəstəyi ilə həyata keçirilib. Kitab üzərində aparıcı alimlər çalışıblar və hərbi xronikaya həsr olunmuş birinci cild artıq dünyanın on dilində nəşr olunub.
“Hazırda antiterror əməliyyatları, bərpa işləri və digər mühüm mövzulara həsr edilmiş ikinci cild hazırlanıb. Onun Azərbaycan və rus dillərində təqdimatı keçirilib, yaxın vaxtlarda isə ingilis dilində də nəşr olunacaq. Bu kitab beynəlxalq səviyyədə geniş rezonans doğurub”, – deyə S.İsmayılova vurğulayıb.
AZƏRTAC-la əməkdaşlıqdan danışarkən direktor qeyd edib: “Dövlət agentliyi ilə uzun illərdir uğurlu əməkdaşlıq edirik. Etiraf edim ki, televiziyanı çox izləmirəm, amma agentliyin saytında xəbərləri mütəmadi oxuyuram. Əminəm ki, məhz AZƏRTAC məlumatları dəqiq, etibarlı və operativ şəkildə təqdim edir”.
Bölmənin digər xəbərləri
